Happy B'day Dear(peer) Gilli....

சர் ஐசக் நியூட்டன்,மா சே துங்,எல்விஸ் ப்ரெஸ்லி,அடல் பிஹாரி வாஜ்பேயி,மெல் கிப்ஸன்,கில்லி என்ற இந்த சங்கிலித்தொடரில் உள்ளவர்களை இணைக்கும் ஒரு பொதுவான விஷயம் என்ன தெரியுமா?

இவர்கள் அத்தனை பேரது ராசியும் கேப்ரிகார்ன் என்பது தான்.

சாதித்தே தீர வேண்டும் என்னும் வெறியுணர்வு கொண்டவர்கள்;புதுமை விரும்பிகள்;நகைச்சுவை உணர்வு நிரம்பியவர்கள்;ஒரு தினுசானவர்கள்; ப்ராக்டிக்கலானவர்கள் ; பொறுமைத் திலகங்கள்;அதே சமயத்தில் ரவுசானவர்கள் என்று ஒரு கலவையான,சுவாரசியமான குணாதிசியங்கள் கொண்டவர்கள் இந்தக் கேப்ரீக்கள்.கில்லி பூவுலகுக்கு வந்த இந்த ஒரு ஆண்டில் இதில் பெரும்பாலானவற்றைக் கண் கூடாகப் பார்க்க முடிந்தது.அப்புறம் இதே கேப்ரீக்களின் பட்டியலில் என்னைப் போன்ற விதிவிலக்குகளும் இருக்கிறோம் என்பதை இந்த நேரத்தில் தெரியப்படுத்த விரும்புகிறேன்.

மாதாந்திர மென்பொருள் வெளியீடு முடிவடைந்து ஈ ஓட்டிக்கொண்டிருந்த ஒரு மத்தியான வேளையில் இணையத்தைக் குடைந்த போது கண்ணுக்குத் தென்பட்டது தான் இந்த கில்லி.ஆரம்பத்தில் மற்றுமொரு வலைப்பதிவு திரட்டி தானே என்றதொரு கண்ணோட்டத்தில் இருந்த எனக்கு கில்லிக்கும் தமிழ்மணம் போன்ற தானியங்கி வலைப்பதிவு திரட்டிகளுக்கும் இடையேயான வித்தியாசத்தைப் புரிந்து கொள்ள உதவியது "கில்லி ஏன்???" என்னும் இந்தக் கட்டுரை.

கில்லி வந்த பிறகு எனது பகுத்தறிவு பல்கிப்பெருகியது;ஏழாம் அறிவு கொஞ்சம் எட்டிப் பார்க்கிறது.தமிழை,தமிழர்களை அடுத்த நூற்றாண்டுப் பயணத்திற்குத் தயார்படுத்துவதில் கில்லியின் பங்கு அளப்பறியது.கில்லி இல்லாத வாழ்க்கையை நினைத்துப்பார்க்கவே பயமாக இருக்கிறது.கில்லியைத் தான் எனது நெருப்புநரியின் ஹோம் பேஜாக வைத்துள்ளேன்.கில்லியை வாழ்த்த வயது,அனுபவம் இன்றி வணங்குகிறேன்.கில்லியின் நலனை வேண்டி மேட்டுப்பாளையம் வனபத்திரகாளியம்மன் கோவிலில் ஆயுஷ் விருத்தி ஹோமம் செய்யப்போகிறேன் போன்ற உண்மைகளை எல்லாம் நான் சொல்லித் தெரிய வேண்டியதில்லை.

சரி..சரி....விஷயத்திற்கு வருவோம்.கில்லியின் வாயிலாகப் படித்தவை ஏராளம் என்றாலும் எனது மனதுக்குப் பிடித்த கட்டுரைகளை இங்கே பட்டியலாக்கியிருக்கேன்.

1)வைகோ திமுகவில் இணைந்து விட்டால் கருத்துக்கள் என்ன விழும் என யோசிக்கிறார் முகமூடி. தமிழக அரசியல்கட்சிகளின் வரலாறைப் பொறுத்த மட்டிலும் 2006ஆம் ஆண்டு நடந்த சட்டமன்றத் தேர்தல் முக்கியமான ஒன்று.இப்படிக் கூட நடந்துப்பாங்களா என்று எண்ண வைத்த பல கேலிக் கூத்தான நிகழ்வுகள் மார்ச்சு,ஏப்ரல் மாதங்களில் நடந்தது.என்றாலும்,தமிழக அரசியலைக் கூர்ந்து கவனித்து வரும் சகபதிவர் கைவண்ணத்தில் பிப்ரவரியில் வெளியான இந்த அரசியல் நையாண்டிக் கட்டுரை குலுங்கிக் குலுங்கி சிரிக்கவைத்தது.

2) அமிர் உல்லா கான் மற்றும் பிபேக் தெப்ராய் என்ற இரு பொருளாதார நிபுணர்களினால் வெளியிடப்பட்ட "பாலிவுட்டின் கண்களின் ஊடாக இந்தியப் பொருளாதார மாற்றம்" என்ற கட்டுரையின் சாரத்தைப் பற்றிய ஆங்கிலப் பதிவு.கில்லி சுட்டாமல் இருந்திருந்தால் இது போன்ற தளங்களை ஜென்மத்துக்கும் நான் பார்வையிடுவேனா என்பது சந்தேகமே

3)இளையராஜாவை வியக்க வைக்கும் இளையராஜா. 1985ல் கல்கி இதழில் வெளியான இளையராஜாவின் பேட்டியிலிருந்து சில பத்திகளை எடுத்து கப்பி பய பதிந்திருந்தார்.பதிவும் அருமை.அந்தப் பதிவின் பின்னூட்டத்தில் நடந்த இளையராஜா பற்றிய கருத்து பரிமாற்றங்களும் அதைக் கப்பி பய கையாண்டவிதமும் அருமை.

4) பிரபல ஹிந்தி இயக்குனர் சுபாஷ் கய்யின் கனவுத் திட்டமான WWI பற்றிய பதிவு இது.ஷப்னா ஆஸ்மி,ஜாவேதா சாப்,கிங் கான்,ஏ.ஆர்.ஆர்.போன்ற பெருந்தலைகள் இந்த கல்விக்கூடத்திலே அகடமிக்கல் அட்வைசர்களா இருக்காங்களாம்.அப்புறமா அடுத்த வருசத்திற்கான விண்ணப்பங்கள் தந்திட்டு இருக்காங்க.பதிவிலேயே இந்த நிறுவனத்தின் இணையதள முகவரியும் இருக்குதுங்கோவ்...
டிபிக்கல் கில்லி டச்: 'கிஸ்னா' மாதிரி படங்களை எப்படி எடுக்கக் கூடாது என்றும் சொல்லித் தருகிறார்களா என்று கேட்கவேண்டும்.

5)மற்ற சமயங்களில் ஊர் ஊராய்ச் சுற்றினாலும் துர்கா பூஜைக்கு சொந்த ஊருக்குப் போன கொல்கத்தாவின் எளவரசர் எடுத்த புகைப்படங்களின் தொகுப்பு தான் இது.சிறந்த முறையில் அமைக்கப்படும் பந்தல்களுக்கு பரிசுகள் வழங்கப்படுவதாய் என்.டீ.டீவியில் மொனுதீபா சொல்லிக்கொண்டிருந்ததாய் நினைவு.அருமையான புகைப்படங்கள்

6)பொறுத்தது போதும் மனோகரா, சிக்சர் அடி. இந்த ஆண்டின் ஆரம்பத்தில் பாகிஸ்தானுக்கு சுற்றுப்பயணம் சென்றது இந்திய கிரிக்கெட் அணி.டெஸ்ட் தொடரைப் பறி கொடுத்த நிலையில் ஒரு நாள் பந்தயங்களில் விளையாடச் சென்றது.ஒரு குழுவாக சிறப்பன முறையில் ஆடி அந்த ஒருநாள் தொடரினையும் வென்றது.அப்போது எழுதப்பட்ட இந்தப் பதிவினை எப்போது படித்தாலும் குபீரெனச் சிரிப்பு வரும்.$செல்வன் இந்த வருடம் புதியதாய் தமிழில் வலை பதிக்க வந்தவர்களில் குறிப்பிடத்தக்கவர்.நையாண்டி,சமூகம்,அரசியல்,சமயம் என்னும் பல்வேறு களங்களில் திறம்பட பல பதிவுகள் தந்தவர்;தந்து கொண்டிருப்பவர்.அவரது ஆரம்பகாலப் பதிவுகளில் மறக்க முடியாத ஒன்று இது.அப்புறம் கில்லியில் பதிவு பற்றிக் குறிப்பிடும் போது,சூப்பர் ஸ்டார் பற்றிய விஷயத்தை ஹைலைட்டாக்கியது பிரகாசரின் திருவிளையாடல் என்பது அனைவரும் அறிந்த ஒன்றே

7)"நான் எஞ்சினியரிங் படிச்சிட்டு இருக்கேன்.என்னைப் போய் எலிமெண்டரி ஸ்கூல் பசங்களுக்கு ட்யூஷன் எடுக்கச் சொல்லாதே" என்று அம்மாவுடன் சண்டை போட்ட கல்லூரி விடுமுறை நாட்கள் நினைவுக்கு வருகின்றன.பொறியியல் படிப்பவர்களுக்குக் கொம்புகள் இரண்டு முளைக்கும்,பொட்டி தட்டும் வேலை மட்டுமே அவர்கள் செய்வார்கள் என்று தீவிரமாய் எண்ணிய நாட்கள் அவை.ஒரு இரண்டாம் நிலைக் கல்லூரியில் படித்த என் போன்றவர்களே இவ்வாறு எண்ணிக் கொண்டிருக்கும் போது, ப்ரீமியர் கல்வி நிறுவனங்களில் படித்த இருவரைப் பற்றி கில்லி வாயிலாகக் கேள்விப்பட்டது மறக்க முடியாத ஒரு விஷயம். அதிகம் பயணப்படாத பாதையினைத் தேர்ந்தெடுக்க மனவுறுதி,தன்னம்பிக்கை தேவை.அப்படிப் பட்ட இருவரைப் பற்றிய கில்லியின் சுட்டி தான் மேலே தரப்பட்டுள்ளது.

8)இது "நமக்கு நாமே" திட்டத்தின் அடிப்படையில் தேர்ந்தெடுக்கப்பட்ட ஒன்று
எனது பதிவுகளில் எனக்கு மிகவும் பிடித்தது;மனதிற்கு நெருக்கமானது.உலக அம்மாக்கள் எல்லாம் ஒரே ரகம் என்பதை பதிவுக்கு வந்த பின்னூட்டங்கள் நிரூபணம் செய்தன.இதுவரை படிக்காமல் இருந்தால் படித்துத் தான் பாருங்களேன்

9)என்ன தான் மொட்டையைத் தாண்டி வெளியே வரவில்லை என்றாலும்,"வாத்யார்" இளவஞ்சியின் எழுத்து நடைக்காக ரசித்த பதிவு இது.அய்யா இப்போது ஹிபர்னேஷன் மோடில் இருக்கிறாராம்.

10) எந்த நேரத்துக்குப் போனாலும் சுடச்சுட இட்டிலி கிடைக்கும் மருதை மாநகரத்தின் ஸ்பெஷல் உணவு ஜிகர்தண்டா மட்டுமல்ல இந்த பீமபுஷ்டி அல்வாவும் தான் என்கிறார் கட்டியக்காரர்.பாதம் அல்வா,கோதுமை அல்வா,பால் அல்வா,மஸ்கோத் அல்வா என்று வகைவகையாகச் சாப்பிட்டிருக்கும் எனக்கு இப்படியும் ஒரு அல்வா இருக்கும் சங்கதி கில்லி மூலமே தெரிய வந்தது.இந்த மாதிரி வழக்கொழிந்த போன உணவு வகைகளை அந்தந்த வட்டாரத்து மக்கள் செய்முறையோடு எழுதினால் எவ்வளவு நன்றாக இருக்கும்??

11)மாற்றமே நிரந்திரமாகி விட்ட உலகில், இதோ வரேன் என்று சொல்லி விட்டுப் போன சௌமியா திரும்ப வரவேயில்லை.ஆதிகாலத்து வலைப்பதிவரான சௌமியாவிற்கு கில்லியின் அஞ்சலி..

12) எனக்கும் கடவுளுக்கும் இருக்கும் தூரம் அறுபத்தெட்டு ஒளி ஆண்டு என்பதைத் தெரியப்படுத்திய பதிவு இது. "1976 வருஷம் பிப்ரவரி இரண்டாவது வாரத்து குமுதத்துல ப்ரியா தொடர் பதினேழாவது அத்தியாயம் இரண்டாம் பக்கம் லெ*ப்ட் சைடு பாட்டத்துல பிரிண்ட் ஆயிருக்கும். போதுமா?! " என்று பின்னூட்டத்தில் ராம்கி பிளிறியது மறக்கக் கூடிய ஒன்றா??

நிற்க....இன்னும் பல பதிவுகளுக்கு இதயத்தில் இடம் அளித்துள்ளேன் என்பதை சொல்லவும் வேண்டுமோ??

இரண்டாம் ஆண்டில் அடியெடுத்து வைக்கும் கில்லி மென்மேலும் பல சிகரங்களைத் தொட வாழ்த்துகள்.

என்ன பாடல் ? என்ன படம் ?

1)விழிகள் இரண்டையும் விளக்காய் மாற்றி
ஊமை விழிக்கொரு ஒளியைத் தாருங்கள்
கருணை உதவியும் இரண்டு கரங்கள் தான்
வாழ்க்கை முழுவதும் வணக்கம் சொல்லுங்கள்

2)அந்த பூமகள் திருமுகம் மேலே
குளிர் புன்னகை புரிவதனாலே
கனவோ நினைவோ எதுவோ

3)தள்ளாடும் பிள்ளை உள்ளமும் வெள்ளை
தாலாட்டுபாட ஆதாரம் இல்லை
தெய்வங்கள் எல்லாம் உனக்காகப் பாடும்
பாடாமல் போனால் எது தெய்வமாகும்?

4)பாடும் பறவைக் கூட்டங்களே
பாசத்தின் மொழியைக் கேளுங்கள்
அண்ணன் என்ற சொந்தமே
அன்னை ஆனதைப் பாருங்கள்

5)பூமலர் தூவும் பூமரம் யாவும்
போதை கொண்டு பூமி தன்னைப் பூஜை செய்யுதே
பூவிரலாலும் பொன்னிதழாலும்
பூவை எண்ணம் காதல் என்னும் இன்பம் சொல்லுதே

6)பூ விழுந்த மாதிரியே மயங்கி மயங்கி விழ வேண்டும்
பொட்டு வைத்த குலமகள் போல் தயங்கி தயங்கி வர வேண்டும்

7)முத்துநகை போலே சுற்றிவரும் பெண்கள் முத்தமழை தேனாக
வந்தவரை லாபம் கொண்டவரை மோகம் உள்ளவரை நானாக...

8)அறிந்தாலும் அதுகூட நீ சொல்லித்தான்
உனக்கேற்ற துணையாக எனை மாற்றவா
குலவிளக்காக நான் வாழ வழி காட்டவா

9)இன்னும் கொஞ்சம் நீளவேண்டும் இந்த நொடி இந்த நொடி
எத்தனையோ காலம் தள்ளி நெஞ்சோரம் பனித்துளி

10)கன்னிப் பெண்ணை மெல்ல மெல்ல தென்றல் தாலாட்ட
கடலின் அலைகள் ஓடிவந்து காலை நீராட்ட
எழுந்த இன்பம் என்ன
என் எண்ணம் ஏங்கும் ஏக்கம் என்ன..

அனைவருக்கும் புத்தாண்டு வாழ்த்துகள்.

கில்லியை மேய்வதில் பிரச்சினையா??

உங்கள் அலுவலகத்தில் இருந்து கில்லியினை மேய முடியவில்லையா???

வீட்டில் இருந்து கில்லி விளையாடுவதில் தடையா???

வாங்க..வாங்க..நீங்களும் எலைட் லிஸ்டில சேர்ந்துட்டீங்க போல.

கூகிளாண்டவர் துணையால கண்டுபுட்ச்ச உரலைக் கீழே தந்திருக்கேன்.முயற்சி செஞ்சு பாருங்கோ...

http://www.google.com/gwt/n?u=gilli.in

மேலும் சில வொர்க் அரௌண்டுகள் கீழே உள்ள உரலில்:
http://labnol.blogspot.com/2005/12/how-to-access-blocked-websites.html

என்ன பாட்டு? என்ன படம்?

என்ன பாட்டு? என்ன படம்?

1)நெஜமா நெஜமா நான் தவிச்சேன்
உன்னையே நினைச்சு உயிர் வளர்த்தேன்
இது ஆணுக்கும் பெண்ணுக்கும் என்னாளும் உள்ள கதை..

2)பொன்னிறத்து மெல்லிடையில் பூவாட
பொட்டு வைத்த வண்ணமுகம் நீராட
தாமரையாள் ஏன் சிரித்தாள்
தலைவனுக்கும் தூது விட்டாள்

3)கடற்கரை எங்கும் மணல்வெளியில் காதலி காலடி தேடினான்
மோகனம் பாடும் வேளையிலும் சிந்துவில் ராகம் பாடினான்

4)கடலொன்று நடுவிலே இல்லையென்று கொள்வினம்
எங்கள் நாடும் இந்த நாடும் ஒன்று தான்
தமிழனர் தமிழர் தான்
புது உடுப்புகள் கிடைக்குமா அக்கா???

5)எண்ணம் என்னும் ஏடெடுத்து எழுதும் பாடலிலே தலைவி
இல்லறத்தில் நல்லறத்தைத் தேடும் வாழ்க்கையிலே துணைவி

6)தினசரி நான் பார்த்த தாமரைப்பூவும்
திருமுகம் காட்டாது போனதென் பாவம்
ஊர் தடுத்தும் யார் தடுத்தும்
ஓயாது நானும் கொண்ட மோகம்

7)மழையும் வெயிலும் என்ன
உன்னைக் கண்டால் மலரும் முள்ளும் என்ன
ரதியும் நாணும் அழகிலாடும் கண்கள்

8)பள்ளி சென்ற காலப்பாதைகளே..
பாலங்கள் மாடங்கள் ஆஹா...
புரண்டு ஓடும் நதிமகள்
இரண்டு கரையும் கவிதைகள்

9)தாமரை மலரில் மனதினை எடுத்து தனியே வைத்திருந்தேன்
ஒரு தூதுமில்லை உன் தோற்றமில்லை
கண்ணில் தூக்கம் பிடிக்கவில்லை.

10)நெல்லின் விதை போடாமல் நெல்லும் வருமா?
வேர்வை அது சிந்தாமல் வெள்ளிப்பணமா?
வெள்ளை இளஞ்சிட்டுக்கள் வெற்றிக்கொடி கட்டுங்கள்...

Remembering N.S.K - ஸ்பெஷல் "ஓ"மப்பொடி

தமிழ்த்திரையுலகின் மறக்கமுடியாத தலை பத்து நபர்களில் தனக்கென ஒரு இடத்தைப் பிடித்த கலைவாணரது பிறந்த நாள் இன்று.இது பற்றி நினைவு கூர்ந்த தருமிக்கும்,பாலபாரதிக்கும் நன்றிகள்.

இவரது ஆரம்பகாலத்திரைப்படங்களைப் பற்றிய ஒரு கதம்பம் தான் இந்தப் பதிவு.

1935:- ராஜா சாண்டோவின் இயக்கத்தில் வெளியான "மேனகா" என்னும் திரைப்படம் தான் என்.எஸ்.கே நடிப்பில் வெளியான முதல் படம்.இதில் தீய குணம் கொண்ட சாமா ஐயர் என்னும் கதாபாத்திரத்தில் நடித்திருந்தார்.

1936:- திரும்பவும் ராஜா சாண்டோவின் இயக்கத்தில் "சந்திரகாந்தா" என்ற திரைப்படத்தில் நடித்தார்.நயவஞ்சகச் செயலுக்குத் துணை போனதால் சிறிது லாபம் அடைந்து தனது பழைய நிலையை மறந்த நாவித முனியன் பாத்திரத்தில் கலக்கியிருந்தார்.

1936:- இந்த ஆண்டு வெளியான "சதி லீலாவதி" தான் இவர் நடிக்க ஒப்புக்கொண்ட முதல் படம் என்றாலும் "மேனகா" முந்திக்கொண்டது.எல்லீஸ்.ஆர்.டங்கனின் இயக்கத்தில் வெளியான இந்தப் படம் தான் மருதூர் கோபாலமேனன் ராமச்சந்திரனுக்கும் முதல் படம்.

1937:- முதன்முதலில் மதுரம் அவர்களுடன் சேர்ந்து நடித்த படமான "வசந்தசேனா" வெளியானது.ராஜா சாண்டோவின் இயக்கத்தில் வெளியான இந்தப் படத்தின்போது தான் என்.எஸ்.கே மதுரத்தைச் சந்தித்தார்.இருவரும் ராஜா சாண்டோவின் தலைமையில் தம்பதிகளாக சேர்ந்து வாழ முற்பட்டனர்.

1937:- எல்லிஸ்.ஆர்.டங்கன் இயக்கத்தில் "அம்பிகாபதி".

1938:- ராஜா சந்திரசேகர் இயக்கத்தில் "தக்ஷயக்ஞம்".

1939:- ராஜா சாண்டோ இயக்கத்தில் "திருநீலகண்டர்",ராஜா சந்திரசேகர் இயக்கத்தில் "மாயா மச்சீந்திரா",ராவ் இயக்கத்தில் "ரம்பையின் காதல்",ரகுநாத் இயக்கத்தில் "ஜோதி (அ) ஸ்ரீமத் இராமலிங்க சுவாமிகள்".

(தொடரும்)

என்னுடைய ஐடியை ஹேக் செஞ்சிட்டாங்க.

மாசம் ஒன்று என்ற கணக்கில் பதிவு போடும் என்னைப் போன்ற சோம்பேறிகளின் ப்ளாக்கர் ஐடியை ஹேக் செய்வதனால் யாருக்கு என்ன லாபம்?

ஒண்ணுமே புரியலை...ஏதாவது அயல்நாட்டு சதியான்னு தெரியலை?

ஆகவே மக்கா,உங்க பதிவுகளில் ஏதாவது ஏடாகூடமான பின்னூட்டம் என்னோட பெயரில இருந்தாத் தெரியப் படுத்துங்க.அதை இட்டது யார்னு கண்டுபிடிக்க முயற்சி செய்கிறேன்.

Inconvenience caused is highly regretted.

"இறைவா.எனது நண்பர்களிடமிருந்து என்னைக் காப்பாற்று.எதிரிகளை நான் பார்த்துக் கொள்கிறேன்" - ஜக்குபாய்

தீபாவளி ஸ்பெஷல் "ஓ"மப்பொடி - 3

1) பாரதியாரது பாடல்கள் முதன் முதலில் திரையில் ஒலித்தது எந்தப் படத்தில்?

2) "பல்லாண்டு வாழ்க" என்ற படத்தில் இடம் பெறும் "ஒன்றே குலம் என்று பாடுவோம்" பாடலுக்கு முன்னால் சில திருக்குறள்கள் இடம் பெற்றிருக்கும்.அவை எவை?

3) பட்டுக்கோட்டையார் இறுதியாக எழுதிய பாடல் எது?

4) கீழ்க்கண்ட இசையமைப்பாளர்கள், பாரதியாரின் எந்தப் பாடல்களுக்கு திரைப்படங்களுக்காக இசையமைத்து உள்ளனர்?
மெல்லிசை மன்னர்
இளையராஜா
வித்யாசாகர்
ஏ.ஆர்.ரகுமான்.

5)"முதல்வன்" படத்தில் அர்ஜூனுக்கும்,ரகுவரனுக்குமிடையிலான தொலைக்காட்சி பேட்டி நல்ல வசனங்களைக் கொண்டிருக்கும்.அந்தப் பேட்டியின் இடையில் ரகுவரன் திருக்குறள் ஒன்றை உதாரணமாய்க் கூறுவார்.அது என்ன?

நான் அடிக்கடி முணுமுணுக்கும் சில பாடல்களின் வரிகள் கீழே உள்ளன.

என்ன பாடல் ??? என்ன படம் ???

1) கன்று குட்டி துள்ளும் போது காலில் என்ன கட்டுப்பாடு
காலம் என்னை வாழ்த்தும் போது ஆசைக் கென்ன கட்டுப்பாடு

2)சிறகில் எனை மூடி அருமை மகள் போல
வளர்த்த கதை சொல்லவா
கனவில் நினையாத காலம் இடை வந்து
பிரித்த கதை சொல்லவா

3)உன் புடவை முந்தானை சாய்ந்ததில் இந்த பூமி பூ பூத்தது
இது கம்பன் பாடாத சிந்தனை உந்தன் காதோடு யார் சொன்னது

4)சோள காட்டு மூலையிலே ...பப்பம்...பப்பரப்பப்பா...
ஒரு சோடி ஒண்ணு சேர்ந்திருச்சு

5)காற்று நம்மை அடிமை என்று விலக்கவில்லையே
கடலும் நீரும் அடிமை என்று சுடுவதில்லயே

6)உந்தன் உதட்டில் நிறைந்திருக்கும் பழரசம்
அந்த மனத்தில் மறைந்திருக்கும் துளி விஷம்

7)பிள்ளைக்கூட்டங்களைப் பார்க்கையிலே,
பிஞ்சு மொழிகளைக் கேட்கையிலே
நல்லவரெல்லாம் நலம் பெறுவார் என்ற நம்பிக்கை பிறக்கிறது

8)இதழோரம் ஆயிரம் சிறு பூக்கள் பூக்கிறாய்
ஒரு கண்ணால் பார்க்கிறாய், ஒதுக்கீடு கேட்கிறாய்

9)நடமாடும் மேகம் நவ நாகரீகம்
அலங்காரச் சின்னம் அலை போல மின்னும்

வரும் பண்டிகை நாட்கள், அனைவருக்கும் ஆனந்தத்தை அள்ளித்தர என் மனமார்ந்த வாழ்த்துக்கள்.

தீபாவளி ஸ்பெஷல் "ஓ"மப்பொடி - 2

நான் அடிக்கடி முணுமுணுக்கும் சில பாடல்களின் வரிகள் கீழே உள்ளன.

என்ன பாடல் ??? என்ன படம் ???

1)ஏரிக்கரையில் ஜோடிப் பறவைகள் எல்லா அழகும் ஆனந்தம்
ஆடும் கடலினில் ஓடும் படகுகள் அதிலே உலகம் ஆரம்பம்

2)நீயோ வானம் விட்டு மண்ணில் வந்த தாரகை
நானோ யாரும் வந்து தங்கிச் செல்லும் மாளிகை

3)ஒரு சின்னப் பூத்திரியில் ஒளி சிந்தும் ராத்திரியில்
இந்த மெத்தை மேல் இளம் தத்தைப்போல் புது வித்தை காட்டிடவா

4)ஒரு தவறு செய்தால் அதைத் தெரிந்து செய்தால்
அவன் தேவன் என்றாலும் விடமாட்டேன்

5)குட்டி தொட்டதால புத்தி கெட்டு போனேன்
ஊறுகாய கொண்டா ஒன்னையும் தொட்டுக்கரேன்

6)கன்னித் தமிழ் தந்ததொரு திருவாசகம்
கல்லைக் கனி ஆக்கும் உந்தன் ஒரு வாசகம

7)சொந்த ஆகாயம் வேண்டும் ஜோடி நிலவொன்று வேண்டும்
நெற்றி வேர்க்கின்ற போது அந்த நிலவில் மழை பெய்ய வேண்டும

8) தாய் மடியில் பிறந்தோம் தமிழ் மடியில் வளர்ந்தோம்
நடிகரென வளர்ந்தோம் நாடகத்தில் கலந்தோம்

9) மேடையைப்போலே வாழ்க்கை அல்ல நாடகம் ஆனதும் விலகிச் செல்ல
ஓடையைப்போலே உரவும் அல்ல பாதைகள் மாரியே பயணம் செல்ல

10) மண்குடிசை வாசல் என்றால் தென்றல் வர மறுத்திடுமா
மாலை நிலா ஏழை என்றால் வெளிச்சம் தர மறுத்திடுமா

தீபாவளி ஸ்பெஷல் "ஓ"மப்பொடி - 1

தமிழ்ப்பதிவுகள் என்ற ஊடகத்தில் முதன்முறையாக் கிசுகிசுக்களைச் சூடாக,சுவையாக தந்த போது சாம்புக்களும்,இரவுக்கழுகாரும் தோன்றியிருக்கவில்லை.இப்படியாகத் தானே உருவாக்கப்பட்ட ட்ரெண்ட்டினைத் தீபாவளி ஸ்பெஷலாய் மீண்டும் தருவதில் மெத்த மகிழ்ச்சியே...(ஹி...ஹி..தற்புகழ்ச்சி எல்லாம் எனக்குப் புடிக்காதுங்ணா)

இந்தச் செய்தியில் சம்பந்தப் பட்டவர்கள் யார்,யார் என்று கண்டு பிடிப்பது மக்களே உங்கள் சமத்து.ஆனால் ...இவர் தானே ...அவர் என்பது போன்ற உங்களுடைய கேள்விகளுக்கு, என்னுடைய பதில் "நோ காமென்ட்ஸ்" என்று தான் இருக்கும் என்பதையும் நினைவில் வைத்துக்கொள்ளுங்கள் :-)

1)அத்துவானக் காட்டில் தேன் தேடிய தனித்துவமான சிட்டு, இப்போது கடல் கடந்து சூரியன் மறையாத நாட்டில் இருக்கிறதாம்.யங் ஜிஞ்சரான டீச்சர் இல்லாத வகுப்பில் எலிகள் துள்ளிக்குதித்து விளையாடுகின்றனவாம்.

"எப்போ வருவாரோ...எங்கள் கலி தீர......???"

2) பெரிய டேமேஜரும்,பெரும்பாலான இனிப்புகளின் அடிப்படையுமான நம்ம ராஜீயின் படைப்புகள் விரைவில் தொலைக்காட்சியில் ஒளிவலம் வரவிருக்கின்றன.தெலுங்கில் வரவிருக்கும் இந்தத் தொடர் ப்ளேக் மாரியம்மனைப் பற்றி இருக்கலாம் என்று நெம்பத்தந்த வட்டாரங்களில் இருந்து வரும் செய்திகள் தெரிவிக்கின்றன

"....ரமணா...ரகுநாதா...பாற்கடல் வாசா...ஜானகி நேசா...."

3)சோள தோசை சாப்பிட்டேன்,அச்சாபீஸ் போனேனே தவிர வேற எங்கேயும் போகலை என்று தல மேல் அடித்துக் கூறும் கிங்கானவருக்கு மஞ்சத்தண்ணி தெளித்தாயிற்று.கர்நாடக ராஜ்யோத்சவத்தன்று இவரது விக்கெட் போல்டாகவிருக்கிறது. ஏணுங்ணா...அதுக்குப் பொறவாலை எழுதுவீங்ளா?

" ....க்கொடியிலே முத்துகள் கோர்த்தால் புன்னகை என்றே பேர் ஆகும்..."

4)தங்கமணியார் வீட்டுக்குப் போன பின் சங்கங்களில் பிளிறிக்கொண்டிருந்த "ஏக் காவ் மே..ஏக் கிஸான்" நடுவில் இண்டர்வெல் விட்டதற்கான காரணம்,ஊருக்குத் திரும்பியுள்ள ஜூனியருடன் அதிக நேரம் செலவிடத்தானாம்.சங்கம் வைத்துத் தமிழ் வளர்த்த இந்தச் சிங்கம் தற்போதைய உள்ளாட்சித் தேர்தலில் போட்டியிட்ட விஷயம் உங்களுக்குத் தெரியுமா??

5)நான் ஒரு பாவி..சாரி...ஆவி என்று கூட இருப்பவர்களை மிரட்டிக்கொண்டிருப்பது நாமக்கோளாறு பிசியின் கல்லூரிக்கால குறும்புகளில் ஒன்று.அமானுஷ்ய ஆவியாருக்கு இதைப் பற்றி ஏதாவது தெரியுமா?

"நானே வருவேன்..அங்கும் இங்கும்...."

உங்களது ஆதரவுடன் தீபாவளி ஸ்பெஷல் "ஓ"மப்பொடி தொடரும்.

விட்டு விடுதலையாகி... - தேன்கூடு போட்டிக்கு

சமையல் ரூமில இருந்து சப்பாத்தி சுடுற சத்தம் கேக்குது.அனேகமா எங்களுக்கு சப்பாத்தி செஞ்சிட்டு இருக்கிறாங்கன்னு நினைக்கிறேன்.ஆன்ட்டி எங்களை இங்கே கூட்டீட்டு வந்த நாளில இருந்து இன்னைய வரைக்கும் எங்களுக்கு ராத்திரி தீஞ்சு போன சப்பாத்திதான் ஆகாரம்.நாங்களும் போட்டதைச் சாப்பிட்டுக்கறோம்;இல்லேன்னா எங்க ஆன்ட்டி கிட்ட திட்டும் உதையும் யாரு வாங்குறது.

நாங்கன்னு சொன்னது என் கூட இருக்கிற அனு,சில்வியா,சித்ரா இவங்களையும் சேர்த்துதான்.அதோ...பச்சை சுடிதார் போட்டிட்டு ஆன்ட்டி துணிகளுக்கு இஸ்திரி போட்டிட்டு இருக்கறது தான் அனு.மத்த ரெண்டு பேரும் வீட்டைத் துடைச்சிட்டு இருக்காங்க. நான் இப்போ தான் என்னோட வேலையெல்லாம் முடிச்சுட்டு வந்து உக்காந்தேன்.சன் நியூஸ் போடற சத்தம் கேக்குது.அட மணி எட்டு ஆயிடுச்சா??

இங்கே இருக்கிற ஸ்கூலில முழுப்பரிச்சை ஆரம்பிச்சிடுச்சி.மதியம் துணி காயப்போடும் போது பார்த்தேன்.பரிட்சை எழுதி முடிச்சிட்டு எல்லாரும், பேடோட வீட்டுக்குப் போயிட்டு இருந்தாங்க.இங்கே ஸ்கூலில யூனிபார்ம் வேற கலர்.இன்னைக்கு தமிழ்ப் பரிச்சையாயிருக்கும்.
என்ன,என்ன கேள்வியெல்லாம் கேட்டாங்களோ?காலாண்டுத் தேர்வில நான் இந்தப் பாடத்தில 86 மார்க்கு வாங்கினேன்.அரையாண்டுத் தேர்வு கூட நல்லாத் தான் எழுதினேன்.எப்படியும் ஒரு 85 மார்க் வாங்கியிருப்பேன்.

"விஜிம்மா..விஜிம்மா....அப்படி என்ன உக்கார்ந்திட்டே கனவு கண்டிட்டு இருக்கே?? ?காலா காலத்துக்கு சாப்பிட வேண்டாமா.."

அட இது எங்க ஆன்ட்டி குரல் போல இருக்கு.இவங்களுக்குக் கூட இப்படியெல்லாம் கூப்பிடத் தெரியுமா??என்னைக்கும் இல்லாம இவ்வளவு பாசமா சாப்பிடக் கூப்பிடறாங்க.இன்னைக்கு மழை கொட்டோ கொட்டுன்னு கொட்டப் போகுது.

"வாம்மா விஜி.உன்னைத் தவிர எல்லாரும் சாப்பிட வந்தாச்சு.ஏன் உனக்குப் பசியே எடுக்கலையா?மதியம் சாப்பிட்டதெல்லாம் இன்னேரம் செரிச்சிருக்கணுமே??வந்து சாப்பிடு வா."

எனக்கு எதுவுமே நம்பமுடியலை.ஆன்ட்டியா இப்படி??அதோ..வலது கைப் பக்க மூலைல இருக்கிறது தான் சமையல் ரூம்.அதுக்குப் பக்கமா இருக்கிற சின்ன ரூம் தான் எங்க டைனிங் ஹால்.நான் போய் சாப்பிடப் போறேன்.எல்லாரும் வேலைய முடிச்சிட்டு சாப்பிட வந்திட்டாங்க போல இருக்கு.நாங்க எல்லாரும் ஒருத்தரை ஒருத்தர் பார்த்திக்கிட்டோம்.எல்லோருக்கும் ஆன்ட்டி இப்படி அன்பா இருக்கறது இது ஒரு அதிர்ச்சியாத் தான் இருந்தது.அதை விடப் பெரிய அதிர்ச்சி,தீஞ்ச சப்பாத்தி தட்டில விழும்னு எதிர் பார்த்து இருந்தா,தட்டில விழுந்த நல்ல சப்பாத்தியப் பார்த்து வந்தது.

"ஹூம்.அப்பா,அம்மா,அண்ணன்,தம்பி,அக்கா,தங்கச்சிவோட சந்தோஷமா இருந்த கொழந்தைக உங்களை இந்தக் கோலத்தில பார்க்கவே ரொம்பக் கஷ்டமா இருக்கு.பாழாப்போன சுனாமி வந்தாலும் வந்தது;எல்லாரோட சந்தோஷத்தையும் வாரீட்டு இல்ல போயிடுச்சு.தெய்வமே...இந்தக் குழந்தைகளுக்கு ஒரு நல்ல வழியைக் காட்டக் கூடாதா?
சகாயம்,அந்தப் பாக்கெட்டில லட்டு இருக்கு.எல்லாருக்கும் ரெண்டு,ரெண்டு லட்டை வையி...."

லட்டுங்கற பேரைக் கேட்டாலே எனக்கு எங்க பாட்டி ஞாபகம்தான் வரும்.எனக்காக குட்டி,குட்டியா லட்டு செஞ்சு அவங்க கையாலேயே ஊட்டி விடுவாங்க.ஹூம்.எல்லாரும் போயிட்டாங்க.அரைப் பரீட்சை லீவுக்கு குடும்பத்தோட வேளாங்கண்ணி வந்தோம்.எவ்ளோ பெரிய அலை...அப்பெல்லாம் அதோட பேரு சுனாமின்னு தெரியலை.
அறிவியல் பாடத்தில எப்பவோ படிச்ச ஞாபகம்.எங்க தம்பியக் காப்பாத்த முடியலையேன்னு,எங்க அப்பாவும் அவருக்குப் பின்னாடி அம்மாவும் கடலில் குதிச்சது இன்னும் கண்ணு முன்னாடியே இருக்கு.சே... என்னைய மட்டும் விட்டிட்டு எல்லாரும் போயிட்டாங்க.

"விஜி.என்னது இது?சாப்பிடறப்போ கண்ணக் கசக்கீட்டு.தட்டிலே போட்டது வேற அப்படியே இருக்கு.ஒன்னை கேம்பில பார்த்தப்போ இருந்ததை விட,இப்போ ரொம்ப இளைச்சுப் போயிட்டியே??சகாயம்,விஜிக்குக் கொஞ்சம் குருமா ஊத்து.வயசுப் பொண்ணுங்க நல்லா சாப்பிட்டுத் தெம்பா இருக்க வேணாமா?பொண்ணுங்களா,சீக்கிரம் தட்டைக் காலி பண்ணீட்டு,போய் தூங்குங்க.காலையில சீக்கிரமே எழுந்திடணும்.வேன் டாண்ணு ஏழரைக்கெல்லாம் வந்திடும்."

என்னோட லட்டை அனுவுக்குக் கொடுத்திட்டேன்.எதுவுமே சாப்பிடப் புடிக்கலை.காலைல இருந்து அம்மா நெனப்பாவே இருக்கு.நேத்திருந்து சொல்லிக்கிட்டே இருக்காங்க.எங்கேயோ போகப் போறோம்னு.எங்கேன்னு மட்டும் தெரியலை.ஆன்ட்டியைக் கேக்கவும் பயமாயிருக்கு.எங்கே கூட்டிட்டுப் போனாலும் பரவாயில்லை ,மூச்சு முட்டிக்கிட்டு இருக்கிற இருட்டான கூண்டில இருந்து கொஞ்சம் நேரம் வெளியே போனா சரிதான்.நாங்க ஒருத்தரை ஒருத்தர் திருதிருன்னு முழிச்சிக்கிட்டே சப்பாத்தியை மென்னு முழுங்கினோம். நாளைக்கு வெளியே போகப் போறோம்கிறதை நெனச்சா ஒரு பக்கம் சந்தோஷமாத்தான் இருக்கு.

"ட்ரிங்...ட்ரிங்...ட்ரிங்...."

"நேரம் கெட்ட நேரத்தில யாரு கூப்பிடறாங்க...ஹூம்..."

"ஹலோ..ஆமாங்க இது கருணை இல்லம் தான்.அட என்ன இது அண்ணாச்சி குரல் மாத்தி எல்லாம் பேசிக்கிட்டு...சௌக்கியமா இருக்கீங்களா?.நானே கூப்பிடணும்னு நினைச்சிக்கிட்டு இருந்தேன்.எல்லாம் ரெடியா இருக்கு.நாளைக்கு கேட் பாஸ் கொடுத்திட வேண்டியதுதான்.நாலு வருது நாளைக்கு ட்ரிப்பில.அட..ஒங்களுக்கு இல்லாததா??சாமிக்குத் தான மொத படையல்.அய்யோ..அப்படியேல்லாம் நீங்க சொல்லக்கூடாது..நாந்தான் உங்களுக்கு நன்றிக்கடன் பட்டிருக்கேன்.அப்புறமா செக் வேணாம்.கேஷாவே கொடுத்திடுங்க.சரிங்க அண்ணாச்சி.நல்லாத் தூங்கி ரெஸ்ட் எடுங்க.நாளைக்குப் பார்ப்போம்.வச்சிடறேன்..."

பொதுவாவே ஆன்ட்டியோட குரல் கணீர்னு கேக்கும்.அதுவும் சந்தோஷத்தில இன்னும் சத்தமா பேசுவாங்க.அவங்க ரூமில ஃபோன்ல ஆன்ட்டி பேசினதில பாதி புரிஞ்ச மாதிரி இருக்கு;புரியாத மாதிரியும் இருக்கு.ஹூம்...என்ன நடக்கப் போகுதுன்னு தெரியலையே...?சே...இந்த கிழிஞ்ச பாயையும், அழுக்குத் தலகாணியையும் பார்த்தா எரிச்சலா வருது.சினிமாவில வார மாதிரி வெள்ளையா,புஸ்ஸுன்னு இருக்கிற மெத்தையில ஒரு நாளாவது படுத்துத் தூங்கணும்.வீட்டில நான் போர்த்தீட்டு இருந்த பச்சைப் போர்வை குளிருக்கு எவ்வளவு நல்லா இருக்கும்..சே..இன்னை ஏன் இப்படி சும்மா சும்மா வீட்டைப் பத்தியே நினைச்சிகிட்டு இருக்கேன்.

"விஜி...இன்னும் தூங்கலியா??? தூக்கம் வரலையா???அப்புறம் நாளைக்கு காலைல ஒருத்தரப் பார்க்க அவங்க வீட்டுக்குப் போறோம்.நல்லாத் தூங்கி காலைல சீக்கிரமே எந்திரிச்சுடணும்.உங்களுக்குப் புதுத் துணி வாங்கி வச்சிருக்கு.தலைக்குக் குளிச்சிட்டு அதைப் போட்டுகிட்டு ஏழு மணிக்கெல்லாம் ரெடியாகிடணும்.மத்த பொண்ணுங்க கிட்டயும் சொல்லீடு.எல்லாரும் தூங்கீட்டாங்க போல..."

புது ட்ரெஸ் போட்டுகிட்டு யாரோட வீட்டுக்குப் போகப் போறோம்?சுடிதாரா இல்லை பாவாடை தாவணியா?எனக்குப் புடிக்காத சிவப்புக் கலர்ல சுடிதார் எடுத்திருக்க் கூடாது.கடவுளே...ஒரு வேளை சினிமாவில வார மாதிரி எங்களை யாருக்காவது வித்துடப் போறாங்களா??சே....ஆன்ட்டி அப்படி எல்லாம் செய்ய மாட்டாங்க.இத்தனை நாளா எங்களைக் கஷ்டப்படுத்தினதை நெனச்சிப் பார்த்து இப்போ மனசு மாறியிருக்காங்க.இல்ல..இல்ல..ஆன்ட்டி எங்கேயோ தப்பான இடத்துக்குத் தான் கூட்டிட்டுப் போகப் போறாங்கன்னு தோணுது.ஆனா எங்கே கூட்டிட்டுப் போகப் போறாங்கன்னு தெரியலையே...கடவுளே...எங்களுக்கு விடுதலை கெடையாதா??

காலைல இருந்து வேலை செஞ்ச அசதீல எப்போ தூங்கினேன்,எப்போ முழிச்சேன்னு தெரியலை.எங்க எல்லார்த்தையும் நல்ல வாசனை சோப்பு போட்டு குளிக்க வச்சு,ஆன்ட்டி போடற செண்ட் அடிச்சு,வாங்கி வச்சிருந்த துணியப் போட்டுக்க வச்சி வேன் ஏறினப்ப மணி 7.35 . நல்ல வேளை என்னோட புது சுடிதார் சிவப்பு கலர்ல இல்லை.என்னோட சுடிதாரை விட அனுவோட சுடிதார் நல்லா இருக்குது.எல்லாரும் புது ட்ரஸ் போட்டிட்டு வேன்ல வெளியே போற சந்தோஷத்தில இருந்தாங்க.ஆனா,எனக்கு மட்டும் ஏதோ நடக்கப் போகுதுன்னு ஒரு நெனப்பு.

கில்லி படத்தில வார மாதிரி ஒரு வெள்ளைக் கலர் வேன்.ஆன்ட்டி நல்ல மூடில இருந்தாங்க போலிருக்கு.ஏதோ பாட்டை முணுமுணுத்திட்டே வந்தாங்க.நான் சாமியக் கும்பிட்டுக் கிட்டே வேனுக்குள்ள ஏறினேன்.இங்க வந்த இந்த மூணு மாசத்தில மொத முறையா இப்போ தான் கேட்டைத் தாண்டி வெளியே போறோம்.இதுவே ஒரு பெரிய விடுதலை கிடைச்ச மாதிரி அனுவோட முகத்தில சந்தோஷம்.

"டேய்..சுரேசு...காலையிலயே சரக்கைப் போட்டிட்டு வந்திட்டியா??ரோட்டைப் பார்த்து மெதுவா ஓட்டு.வேற வண்டி இல்லையா??இந்த பாழாப்போன குவாலிசையே எடுத்திட்டு வந்து எழவு கொட்டாட்டி என்ன?"

வீட்டுக்குள்ளேயே அடைஞ்சு கிடந்த எங்களுக்கு அந்த ரோட்டோரக் காட்சிகள் ரொம்ப புடிச்சுப் போச்சு.வேடிக்கை பார்த்திட்டு வந்தோம்.திடீர்னு ஒரு ஐடியா தோணுச்சு.பாத்ரூம் வருதுன்னு சொல்லி வேனை நிப்பாட்டச் சொல்லி,இறங்கி ஓடிப் போயிடலாம்னு தோணிச்சு.கொஞ்ச நேரம் பொறுத்து சொல்வோம்னு வெயிட் பண்ணீட்டு இருக்கேன்.

க்ரீச்ச்...க்ரீச்ச்ச்....

"டேய்...டேய்....பார்த்து மெதுவா பிரேக்கைப் போடு..."

"சாரிக்கா...இனிமே பார்த்துப் போறேங்கா..."

"அய்யோ..எருமை மாடு நடு ரோட்டில...பார்த்து...அம்மா....."

க்ரீச்...டபார்.....

"அய்யோ...அம்மா...கர்த்தரே.....அய்யோ...."

உங்க எல்லாருக்கும் டாடா....விடுதலை கொடுத்த சாமியப் பார்க்கப் போறேன்.உங்களோட கோரிக்கை ஏதாச்சியும் இருந்தா சொல்லுங்க...அவர் கிட்டே சேர்த்திடறேன்.....

---------------------------------------------------------------------------------

சற்றே பெரிய கதை,உங்களது ஆதரவினை வேண்டி...

அன்புடன்,
சுதர்சன்.கோபால்

---------------------------------------------------------------------------------

இவர் யாரோ? என்ன பேரோ?

மால்குடியும் சில கேள்விகளும்

R K நாராயண் (அக்டோபர் 10, 1906 - மே 13, 2001)

இவரது முழுப்பெயர் ராசிபுரம் கிருஷ்ணசுவாமி நாராயணசுவாமி.ஆரம்ப காலங்களில் R K நாராயணசுவாமி என்ற பெயரில் எழுதி வந்த இவர் கிரஹாம் கிரீனின் ஆலோசனைப்படி "Swami and Friends" என்ற படைப்பின் வெளியீட்டிலிருந்து தனது பெயரை "R K நாராயண்" என்று சுருக்கி வைத்துக் கொண்டார்.

பாடப்புத்தகம் போரடிக்கிறது என்ற காரணத்தால் கல்லூரியில் ஆங்கில நுழைவுத் தேர்வில் முதல் முறை எழுதும்போது கோட்டைவிட்டார்.ஆனால் ஒரு வருடம் கழித்து திரும்பவும் எழுதி மைசூர் பல்கலைக்கழகத்திலிருந்து பட்டமும் பெற்றார்.

இவருடைய படைப்புகள் ஹீப்ரு மற்றும் அனைத்து ஐரோப்பிய மொழிகளிலும் மொழி பெயர்க்கப்பட்டிருக்கின்றன.

1958ல் சாஹித்ய அகாதமி ,1964ல் பத்ம பூஷன்,1980ல் ராயல் சொசைட்டி ஆஃப் லிட்டரேச்சர் அமைப்பால் பென்சன் விருது, 2000ல் பத்ம விபூஷன் என்று இவருக்குக் கிடைத்த விருதுகள் ஏராளம்.

---------------------------------------------------------------------------------------------------

இதோ இவரைப் பற்றியும் படைப்புகள் பற்றியும் ஒரு சில கேள்விகள்.சரியான பதில் தருவோருக்கு "மால்குடி கொண்டான்" என்ற பட்டமும் அவரவரது கட்சி சார்புக்கு ஏற்றவாறு மஞ்சள்/பச்சை/கருப்புத் துண்டுகளோ வழங்கப்படும்.

1) "Swami and Friends" தொகுப்பில் வரும் சுவாமியின் நண்பர்கள் பெயர் என்ன?

2) R K நாராயணின் முதல் புத்தகம் வெளியாக உதவியவர் யார்?

3) தென் இந்தியாவின் எந்த கற்பனை நகரத்தினை அடிப்படையாகக் கொண்டு இவரது கதைகள் எழுதப்பட்டன?

4) எந்த ஆண்டு "The Vendor of Sweets" வெளியானது?

5) "The Guide" என்ற நாவலின் கதை நாயகன் யார்?

6) மால்குடியின் மூன்று முக்கிய லேண்ட்மார்க்குகளைக் குறிப்பிடவும்.

7) R K நாராயண் எந்த ஊரில் தனது "The Guide" நாவலை எழுதினார்?

8) முதன் முதலில் வெளியான R K நாராயணின் படைப்பு எது?

9) இவரது படைப்புகளுக்குப் பாந்தமான ஓவியங்களை வரைந்த இவரது சகோதரர் பெயர் என்ன?

10) இவர் எழுதிய இரண்டு பயணக் குறிப்புகளின் பெயரைக் கூறவும்.

மால்குடிக்கு நூறு வயது

வரைபடத்தில் தேடிப் பெறமுடியாத மால்குடியின் சொந்தக்காரருக்கு இன்றோடு நூறு ஆண்டுகள் ஆயிற்றாம்.

வையத்துள் வாழ்வாங்கு வாழ்பவன் வானுறையும்

தெய்வத்துள் வைக்கப் படும்.

பசந்தீ,உன்னோட பேரு என்ன?

இருக்கையுடன் கட்டிப்போடும் திரைக்கதை,அற்புதமான நடிப்பு,தேர்ந்த நடிகர் தேர்வு,கதைக்கு மிகவும் பொருத்தமான ஒளிப்பதிவு,பாந்தமான இசை என்று ஒரு படம் வெற்றி பெறத் தேவையான அத்தனை அம்சங்களையும் உள்ளடக்கிய"ஷோலே"வில் இடம்பெற்ற மேற்படி வசனத்தை யாரும் மறந்திருக்க வாய்ப்பில்லை.


1975ல் வெளியாகி சக்கை போடு போட்ட படமான "ஷோலே",திரும்பவும் ராம்கோபால் வர்மாவால் எடுக்கப்பட்டு வருகிறது.பல்வேறு சர்ச்சைகளுக்கு இடையே எடுக்கப்பட்டு வரும் இந்தப் படத்திற்கு,"ராம் கோபால் வர்மாவின் ஷோலே" என்று பெயரிடப்பட்டு உள்ளது.தனது .ஃபேக்டரியிலிருந்து புதிய பொருட்களைச் சீரான கால இடைவெளியில் வெளியிட்டுக் கொண்டிருக்கும் ராம் கோபால் வர்மா இந்தப் படத்தை இயக்குவது ஆட்லேப்ஸுக்காக.

ஹேமமாலினி ஏற்று நடித்த பசந்தீ கதாபாத்திரத்தைத் தவிர மற்ற முக்கிய பாத்திரங்களுக்கு நடிகர்கள் தேர்வு முடிந்த நிலையில் இந்தப் படத்தின் ஷூட்டிங் மும்பையில் ஆரம்பித்துவிட்டது.கப்பார்சிங்காக அமிதாப் பச்சன்,வீருவாக அஜய் தேவ்கன்,ஜெய்யாக மோஹித்,தாக்கூராக மோகன்லால்,விதவை ராதாவாக சுஷ்மிதா சென் என்று ஒரு கலவையான நட்சத்திரக் கூட்டமே இதில் தெறமை காட்டுகிறது.இடைவேளைக்குப் பின்னால் வரும் "மெஹ்பூபா" பாடலை யாராலும் மறக்க முடியாது எனலாம்.அந்தப் பாடலுக்கு ஆடவிருப்பவர் யார் தெரியுமா? வர்மாவின் உள்ளம் கவர் கள்ளி ஊர்மிளா தான்.

போன வாரம் கப்பார்சிங்கின் புதிய தோற்றம் மும்பையில் ஒரு நிகழ்ச்சியில் அமிதாப்பினால் வெளிவிடப்பட்டது.அதைத் தான் போன பதிவில் நீங்கள் பார்த்திருப்பீர்கள்.

ஹூம்.தமிழில் இப்படிப் பழைய படங்களைத் திரும்ப எடுத்தால் எவ்வளவு நன்றாக இருக்கும்.

சூர்யா-ஜோ நடிப்பில் மிஸ்ஸியம்மா,சீயான் - சதா நடிப்பில் பலே பாண்டியா என்று எனது படத் தேர்வுகள் நீளும் ஒரு மைலுக்கு.தமிழில் இப்படிப்பட்ட முயற்சிகளில் எந்தப் படங்களை,யார் நடிப்பில் பார்க்க உங்களுக்கு விருப்பம்??

காசா..பணமா..சும்மா அடிச்சி ஆடுங்கப்பா...

கலைநிகழ்ச்சியும்,கட்டான ஒரு டெலிஃபோன் கம்பியும்

"ஹலோ...ம்மா..நான் தான் பேசறேன்.இவ்ளோ நேரமா டெலிஃபோன் அடிக்குது.என்ன செஞ்சிட்டு இருந்தீங்க??"

"நல்லாருக்கியா தம்பி. குப்பையக் கொண்டு போய்க் கொட்டப் போயிருந்தேன். வரும்போது வழியில லோகநாயகியக்கா எடுத்த தீபாவளி சேலையப் பார்த்திட்டுப் போங்கன்னு ஒரே ரகளை. அங்கே நின்னு ஒரு அஞ்சு நிமிஷம் ஆகியிருக்கும். அப்போ பார்த்து தான் நீ கூப்பிட்டிருக்கே."

"ஏம்மா.குப்பையக் கொட்ட நீ தான் போகணுமா? செல்வியக்கா வேலைக்கு வர்லையா? அவங்களுக்கு ஒடம்பு இன்னும் சரியாகலையா?"

"செல்விக்கு வந்த சிக்குன்குனியா, இப்போ நல்லாயிருச்சு. ஆனா அவ பொண்ணு சாந்திக்கு தான் ஏதோ கிட்னில ஸ்டோன் வந்து ஆஸ்பத்திரியில இருக்காளாம். பாவம் செல்விக்கு கஷ்டத்துக்கு மேல கஷ்டம்.செலவுக்கு மேல செலவு. நான் கூட ஆஸ்பத்திரி போய்,பார்த்துட்டு வந்தேன். ஆஸ்பத்திரியில பக்கத்து பெட்டுல நம்ம எளனீக்கடை குருசாமியோட பொண்ணும் இதே மாதிரி கிட்னில ஸ்டோன் வந்து அட்மிட் ஆகியிருந்தது.

ஆமா,இந்த ஸ்டோன் எதனால வாரது தம்பீ?"

"ஹூம். பொதுவா சிறுநீர் கழிக்கணும்கிற உணர்வு வந்தவுடனே போகாம அடக்கி வச்சிருந்தா அது ஸ்டோனா மாறுவதற்கு வாய்ப்பு இருக்கு. இது ஒரு முக்கிய காரணம். இது போகப் பல காரணங்கள் இருக்கு. அது சரி இந்தப் பொண்ணுங்க படிக்கிற ஸ்கூலில் முறையான கழிப்பிட வசதி இருக்கா?"

"ஓஹோ. அது தான் விஷயமா? அந்த ஸ்கூல்ல லெட்ரின் எல்லாம் கெடையாது. எல்லாம் திறந்தவெளீல தான் போகோணும். வயசுக்கு வந்த புள்ளைக எப்படிப் போகும்.சாயங்காலம் ஸ்கூல் முடியறவரைக்கும் அப்படியே கட்டுப்படுத்தீட்டு தான் இருக்கும் போல. பாவம். இலவசமா என்னென்னமோ கொடுத்து என்ன பண்றது. இந்த மாதிரி கழிப்பிட வசதியில்லாத பள்ளிகளுக்கு ஏதாவது செஞ்சிருக்கலாம்."

"அதெல்லாம் நமக்கெதுக்கு ம்மா...நேத்தைக்கு சாயங்காலம் நாலு வாட்டி ஃபோன் செஞ்சேன். ஏன் யாருமே எடுக்கலை? கடைக்குப் போயிட்டீங்களா?"

"இல்லை தம்பி. திரையுலகம் எடுத்த பாராட்டுவிழாவை சுவாரஸ்யமாப் பார்த்திட்டு இருந்தோமா. யாராச்சியும் ஃபோன் பண்ணி தொந்தரவு செஞ்சா என்ன பண்ரதுன்னு நெனச்சி,ஃபோன் ஒயரைக் கழட்டி விட்டிருந்தோம். புரொக்கிராம் எல்லாம் சூப்பரா இருந்திச்சு கண்ணூ. ஆமா..நீ பாக்கலை?"

"நற....நற....நற....நற...."

முன்னாள் நட்சத்திரத்தின் நன்றிகள்

பத்தாயிரத்து எண்பது நிமிஷங்கள்...

இரண்டாயிரத்து சொச்சம் ஹிட்டுகள்...

சிலருக்குக் கொஞ்ச நேர இளைப்பாறல்கள்...

என்று எனது நடத்திர வாரம் ஒரு வழியாய் நிறைவுக்கு வந்துவிட்டது.

இந்தியா விடுதலை அடையும் சமயத்தில் எனது பதிவுகளினின்று உங்களுக்கும் விடுதலை கிட்டியிருக்கிறது.இந்த மின்மினி திரும்ப தனது பழைய கூட்டிற்கு செல்லவிருக்கிறது.திடீரென முளைத்த அலுவலக சிக்கல்களினால் திட்டமிட்ட படி சில பதிவுகளைப் போட முடியவில்லை.

கல்யாண சமையலில் ஆரம்பித்த வாரம், காணாமல் போனவர்களில் நிறைவு பெறுகிறது.இதில் சில பதிவுகளை மீண்டும் பின்னர் தொடர்வதாய் இருக்கிறேன்.தினப்படி எனது பதிவுகளைப் படித்த, பின்னூட்டமிட்டு என்னை ஊக்குவித்த அனைவருக்கும் எனது நன்றி.வாய்ப்பளித்த மதி கந்தசாமிக்கும் காசி ஆறுமுகத்திற்கும் நன்றி பல.அடுத்து வரும் நட்சத்திரங்களுக்கு முன்கூட்டிய வாழ்த்துகள்.

அன்புடன்,
சுதர்சன்.கோபால்

"உங்கள் அனைவருக்கும் எனது இந்திய விடுதலை நாள் வாழ்த்துகள்!"

கொறிக்கக் கொஞ்சம் "ஓ"மப்பொடி - 7

"அம்மா.ரொம்ப நாளா இந்த பட்டுப் புடவையை ட்ரை வாஷ் பண்ணணும்னு இருந்தீங்களே..." என்று பெண்பிள்ளை ஆரம்பித்தால் அடுத்து வரப்போவதைத் தாராளமாக ஊகிக்கலாம் - "அந்தப் பட்டுப்புடவையும் திருமண பஃபே விருந்தில் கலந்து கொண்டு பசியாற்றியது" என்று.

எப்பொருள் யார் யார் வாய் கேட்பினும்
அப்பொருள் மெய்ப்பொருள் காண்பதறிவு.

எங்க கீழே சொல்லியிருக்கிற மேட்டர்கள்ள மெய்ப்பொருள் என்ன என்னன்னு சொல்லுங்க பார்ப்போம்.

1.கல்யாணத்திற்குக் கெளம்பரப்ப தான் ஞயாபகம் வந்திச்சி இன்னைக்கு ஞாயித்துக் கிழமைன்னு.இந்த ஊர்ல எவன் ஞாயித்துக் கிழமையன்னிக்கு கடைய சீக்கிரமே தொறக்கப்போரான்... ஹி.ஹி..

2.நம்ம சூலூர் பிரேஞ்சில உங்களப் போல ஒரு அனுபவஸ்தர் இல்லாமத் தான் குட்டிச்சுவர் ஆகிப்போச்சு.

3.ஸ்போர்ட்சிலயெல்லாம் உங்க பையன் தான் ஸ்கூல்லயே முதல்..

4.அடடா..நீங்க சொல்ரது சரிதான் சார்.ரொம்பத்தான் ஒழுகுது.ரிப்பேர் செஞ்சிட வேண்டியது தான்.

5.ஏம்பா.உங்க பேனா உடையவே உடையாதுன்னு சொல்லீட்டு இருந்தீங்களே...

6.இஸ்திரிக்கு போட்டிருந்த அந்த புளூக் கலரு கட்டம் போட்ட சட்டை புதுசுங்களா???

7.ஆமாம்.காவிக்கலர்ல இந்தச் சேர்ல தான் இருந்தது.நீங்க தான் அந்த கர்ச்சீப்பைப் போட்டு வச்சிருந்தீங்களோ??

8.என்ன சார்.நீங்க ஏறும் போதே தெளிவா சொல்லியிருக்காலம்ல இன்னர் ரிங் ரோடு தான் போகணும்னு.

9.உப்பெல்லாம் புக்ல சொல்லியிருக்கிற அளவு தான் போட்டேன்.ஆனாக்கூட....

இது ஒரு மீள்பதிவு ஆகும்.

"காணாமல் போனவர்கள்" ஸ்பெஷல்

தூர்தர்ஷன் கோலோச்சிக் கொண்டிருந்த காலமது.

எல்லா நாள் நிகழ்ச்சிகளினிடயே எதிர்பாராமல் வரும் "தடங்கலுக்கு வருந்துகிறோம்" என்ற் அறிவிப்புப் பலகையையும்,வெள்ளியன்று "ஒலியும் ஒளியும்" முன்னால் சிவபூசைக் கரடியாக வரும் "எதிரொலி" நிகழ்ச்சியினையும் வெறுக்காத ஆட்கள் இல்லை எனலாம்.இது போல் மறக்க முடியா இன்னுமொரு நிகழ்ச்சி "காணாமல் போனவர்கள் பற்றிய அறிவிப்பு".எங்கள் வீட்டில் யாருக்குமே பிடிக்காத இந்த நிகழ்ச்சியானது சொல்லத்தெரியாத காரணங்களுக்காக எனக்கு ரொம்பவும் பிடிக்கும்.

காணாமல் போன தினத்தில் கறுப்பு நிறக் கால்சட்டை அணிந்த சிறுவனின் ஒளிப்பட முகத்தில் தெரியும் மென் சோகம் என்னை என்னவோ செய்த நாட்களும் உண்டு."நான் காணாமப் போயிட்டா பழனீ விஜயா ஸ்டூடியோவில எடுத்த கலர் ஃபோட்டோ தான் TVக்கு தரணும்" என்று எத்தனை முறை சண்டையிட்டிருப்பேனோ எனக்கே தெரியாது?

காணாமல் போனவர்களைக் கண்டுபிடிக்க உதவியவர்கள் என்று ஒரு பட்டியல் போட்டால் அதில் "கண்டேன் சீதையை" என்று வந்த அனுமனுக்குத்தான் முதலிடம் தரப்பட வேண்டும்.இதில் தூர்தஷனுக்கும் அதில் வரும் கா.போ.ப.அறிவிப்புகளுக்கும் எத்தனையாவது இடம் வரும் என்று சத்தியமாக எனக்குத் தெரியாது.

சரி,,சரி,,விஷயத்துக்கு வருவோம்.

நமக்கெல்லாம் நன்கு அறிமுகமான சிலர் கொஞ்ச நாளாய்க் காணாமல் போய்விட்டார்கள்.அவர்களைக் கண்டுபிடிக்கத் துப்பு கொடுப்பவர்களுக்கு மயில்ஜீயுடன் ஒரு "அதிரடிப் பரிசு"ம் உண்டு.

நபர்1 :- "மூலிகை பெட்ரோல் புகழ்" ராமர் பிள்ளை
மாற்று எரிபொருள் பற்றிய ஆராச்சியில் தமிழகத்திற்குப் பெருமை தேடித் தந்தவர். 90களின் இறுதியில் இவரது கட்டுரை வாராத வாரப் பத்திரிக்கைகளே இல்லை
எனலாம்.ராஜபாளையத்தைச் சேர்ந்த இவர் காணாமல் போய் விட்டாரா இல்லை சிறை வாசம் முடித்துவிட்டு வந்து விட்டாரா என்று தெரியவில்லை.துப்பு கொடுப்பவர்களுக்கு "வைக்கோலில் இருந்து சாம்பலை உருவாக்குவது எப்படி" என்னும் புத்தகம் பரிசாக வழங்கப்படும்.(ஆமாம் இப்போ இவர் வளர்ப்பு குடும்பம் எப்படி இருக்கு??)

நபர் 2:- ஷ்ரீவித்யா

எம்.எல்.வி. என்னும் ஒரு மாபெரும் இசைக்கலைஞரின் மகளாய்ப் பிறந்து ஒரு நட்சத்திர இயக்குனரால் வெள்ளித்திரைக்கு அறிமுகமாகிப் பல்வேறு கதாபாத்திரங்களை அனாயசமாக எற்று நடித்த இவரைக் கடந்த 2 ஆண்டுகளாகத் தமிழ் திரையில் காணவில்லை.கடைசியில் கண் பார்வை இழந்தவராக "லண்டன்" என்னும் படத்தில் பார்த்ததாய் ஞாபகம்.உச்ச நட்சத்திரத்திற்கு இணையாக,அக்காவாக,அம்மாவாக நடித்த இவர் அடுத்த படத்தில் பாட்டியாய் நடிக்கவிருக்கிறார் என்று ஒரு பேச்சு அடிபட்டது உண்மையாக இருக்குமோ(ஆமா,ஜெயேந்திரர் வழக்கில இவங்களுக்கும் ஏதோ ஒரு சம்பந்தம் இருக்குதுன்னு பேசிக்கிறாங்களே.அது இன்னா மேட்டர்??)

நபர் 3:- அஜீத்ஜோகி
இந்திய ஆட்சியமைப்புத் துறையில் தாழ்த்தப்பட்டோர் கோட்டாவில் நுழைந்த இவர் அப்போதைய மத்தியப் பிரதேச மாநில முதலமைச்சர் அர்ஜூன் சிங்கின் ஆணைக்கேற்ப அரசுப்பணியினை விட்டு அரசியலில் நுழைந்தார்.மத்தியப் பிரதேசத்திலிருந்து பிரிந்து சென்ற சட்டீஸ்கர் மாநிலத்தின் முதலாம் முதலமைச்சராய் பல தில்லாலங்கடி வேலைகளைச் செய்தார்.2003ல் நடந்த தேர்தலில் முதலமைச்சர் நாற்காலியைப் பறி கொடுத்த இவர் 2004ஆம் ஆண்டு நடந்த நாடாளுமன்றத் தேர்தலில் வெற்றி பெற்று மத்திய அரசியலில் நுழைந்தார்.அப்போது நடந்த ஒரு மோசமான விபத்தில் அதிர்ஷ்டவசமாக உயிர் தப்பிய பின்னர் இவரது சௌவுண்டை எங்கும் காணோம்.(அது சரி.சமீபத்தில 25 எம்பிக்களுடன் சேர்ந்து சோனியாதான் பிரதமராகணும்னு நீங்க அனுப்பின மனுவுக்குப் பின்னால உள் குத்து ஒண்ணும் இல்லையே??)

அடுத்து வருபவர்கள் "குத்துவிளக்கு" கோபாலகிருஷ்ணன்,"சின்ன சின்ன ஆசை" மின்மினி,"சிட்டிசன்" ஷரவண சுப்பையா.

வெளியே செல்லவிருப்பதால் "மறுமொழி மட்டுறுத்தல்" கொஞ்சம் தாமதமாவே நிகழும்.பொறுத்தருள்க :-)

கொறிக்கக் கொஞ்சம் "ஓ"மப்பொடி - 6

இன்றைக்குக் கொறிக்க, "பெங்களூரு" பற்றிய சில தகவல்களும் கேள்விகளும்:

தகவல்கள்:

1)இந்தியாவில் முதன்முதலில் மின்சார வசதி ஏற்படுத்தப்பட்ட நகரம் பெங்களூர் ஆகும்.வந்த ஆண்டு 1905.

2)அந்தமானில் 1872ல் படுகொலை செய்யப்பட்ட அப்போதைய இந்திய கவர்னர் ஜெனரலான மேயோவின் நினைவாகக் கட்டப்பட்டதே எம்.ஜீ.ரோட்டிலுள்ள மேயோ ஹால் ஆகும்.பொது மக்கள் உதவியுடன் கட்டப்பட்ட இது 1883 ஆம் ஆண்டில் அப்போதைய நகராட்சியின் வசம் ஒப்படைக்கப்பட்டது.

3)மெஜஸ்டிக் என்று அழைக்கப்படும் இடத்தின் உண்மையான பெயர் காந்திநகர் ஆகும்.அந்த இடத்தில் அப்போது மிகவும் பிரபலமாக இருந்த மெஜஸ்டிக் டாக்கீஸால் இந்த இடத்திற்கு இப்பெயர் வந்தது.

4)1760-ல் ஹைதர் அலியால் உருவாக்கப்பட்ட "லால் பாக்கின்" நிஜப் பெயர் என்ன தெரியுமா?
"மேங்கோ டோப் & சைப்ரஸ் கார்டன்"

கேள்விகள்:
1)70களின் பிற்பகுதியில்,பெங்களூரின் இந்தக் குறிப்பிட்ட பகுதியானது ஆசியாவிலேயே மிகவும் வேகமாக வளர்ந்து வரும் பகுதியாகக் குறிப்பிடப்பட்டது.அது எந்தப் பகுதி?

2)BTM மற்றும் HSR லே-அவுட்டுகளை விரிவு படுத்துக.

3)பெங்களூரு ஏரிகளினால் ஆன நகரம்....இல்லை.இல்லை. நகரமாக இருந்தது.இப்போது முக்கால்வாசி ஏரிகள் ஆக்கிரமிக்கப்பட்டு அவை இருந்த இடங்களில் காங்க்ரீட் கட்டிடங்கள் தான் இருக்கின்றன.கீழே கொடுக்கப்பட்ட ஏரிகளின் மீது தற்போது காணப்படும் பெயர் பெற்ற கட்டிடங்கள் என்ன என்று கண்டுபிடிக்க முடியுமா?

சம்பங்கி ஏரி,தரமம்புடி ஏரி.

4)நான் குறிப்பிடும் இந்த மனிதர் பெங்களூரில் சில காலம் மல்லேஸ்வரத்திற்கும்,பசவன்குடிக்கும் இடையே செல்லும் 14ஆம் நம்பர் அரசுப் பேருந்தில் வேலை பார்த்து வந்தார்.இவரது விசில் ஊதும் அழகைப் பார்க்கவே கூட்டம் இவரது பேருந்தில் அள்ளுமாம்.இவர் யார்??

ஆப்பரேஷன் "மொட்டைக் கடிதாசு" - பகுதி 2

வினோத்தோட மேனேஜர் பேசுகிறேன்:

உங்க கிட்ட வினோத் ஏதோ சொல்லீட்டு இருந்தான் போல இருக்கு.என்னைப் பார்த்ததுமே நழுவிட்டான்.என்ன சொன்னான்னு நான் உங்ககிட்ட கேட்கக்கூடாது.அது அநாகரீகம்.அவன் சொன்னதக் காது கொடுத்துக் கேட்ட நீங்க,நான் சொல்லப் போறதையும் கொஞ்சம் கேளுங்களேன்.

இன்று காலை 10:45 மணி:

நான் செஞ்சதை என்னாலயே நம்ப முடியலை.கொஞ்சம் அவசரப்பட்டுட்டேன் போலிருக்கு.வெறுமனே என்னோட மொபைல் நம்பர் மட்டும் கொடுத்திருக்கலாமோ?என்ன செய்ய ஒரு தடவை "சென்ட்" பட்டனை அமுக்கிய பிறகு கன்ட்ரோல் நம்ம கிட்ட இல்லையே.சரி.என்னதான் நடக்குதுன்னு பார்ப்போமே

"ஹலோ.யெஸ் சார்..ஓக்கே சார்.இப்போ வர்ரேன்".

நேரம் காலம் தெரியாம இந்த நேரம் பார்த்து ஆந்தைகண்ணன் கூப்பிடறான்.வேற
யாருமில்லை.என்னோட பாஸ் தான்.எதுக்காக இருக்கும்??

நான் போயிட்டு வந்திடறேன்.அதுக்குள்ள நீங்க போய் தமிழ்மணத்தில புதுசா எதுனாச்சி வந்திருக்கான்னு பார்த்திட்டு வந்திடுங்க.

11:45 மணி:

என்னோட பாஸ் சொன்னத இன்னும் என்னால நம்பவே முடியலை.நான் வெளிநாடு போக முயற்சி செஞ்சிட்டு இருக்கறதப் பத்தி இவருக்கு எப்படித் தெரிய வந்தது.யாராவது போட்டுக்கொடுத்திருப்பாங்களா?இல்லைன்னா அது பத்தி இவர் ஏன் அதுவும் திடீர்னு இன்னைக்கு கேக்கறாரு?எனக்கென்னமோ இந்த வினோத் மேலயும் செபாஸ்டியன் மேலயும் தான் கொஞ்ச சந்தேகமா இருக்கு.செபாஸ்ட்யன் வேற நான் ரெண்டு மூணு வாட்டி கன்சல்டன்ட் கிட்ட பேசரதப் பார்த்திருக்கான்.அதுவும் தவிர எனக்குத் தெரிஞ்சவரை இந்த ஆஃபீஸில என்மேல காண்டு இவனுங்க ரெண்டு பேருக்குத் தான்.ஹூம்.இப்ப என்ன செய்யலாம்???

அட வைப்ரேட்டர் வேற சத்தம் போடுது.செந்தில் தான் கூப்பிடறான்."சொல்லு செந்தில்.ஆமாம்.நான் பெரிசு கூடப் பேசிட்டு இருந்தேன்.நானே உன்னைக் கூப்பிடலாம்னு நினைச்சிட்டு இருந்தேன்.மேட்டர் என்னங்கறத நான் கேன்டீன்ல சொல்றேன்.இல்லை இன்னைக்கு நான் கார்ல தான் வந்திருக்கேன்.ஓக்கே...பை..."செந்தில் என்னோட மூணாம் வகுப்பில் இருந்து ஒன்பதாம் வகுப்பு வரை ஒண்ணாப் படிச்சவன்.பல இடங்கள்ள குப்பையைக் கொட்டிட்டு ஆறு மாசம் முன்னாடி தான் எங்க கம்பெனியில சேர்ந்தான்.வேற,வேற கட்டிடத்தில வேலை செஞ்சாலும்,அப்பப்போ கேன்டீன்ல சந்திச்சுக்குவோம்.நீங்களும் என் கூட கேன்டீனுக்கு வாங்க.உங்களுக்கு வேணும்கிற எல்லா ஐட்டமும் கிடைக்கும்.0f course dutch treat தான்.

"என்ன விஷ்வா.ரொம்ப டல்லா இருக்கே.ஏதாவது பிரச்சினையா?"

"ஆமா செந்தில்.பெரிசுக்கு நான் வெளிநாடு போகறதுக்கு முயற்சி செஞ்சிட்டு இருக்கற விஷயம் எப்படியோ தெரிஞ்சுபோச்சு.யாரோ என் டீம்ல இருந்து தான் போட்டுக் கொடுத்திருக்காங்க.பக்கா ப்ரூஃபோட பேசுது பெரிசு.எவனோ கூட்டுக்களவாணிக மொட்டைக் கடிதாசு மாதிரி ஏதோ ஒண்ணைப் போட்டு என்னோட விக்கெட்டை சாச்சிட்டாங்க.சே...."

"சரி....சரி...விஷ்வா...அந்த சாஸைக் கொஞ்சம் இப்படித் தள்ளு.அப்புறம் உங்க பெரிசு அதுக்கு என்ன சொல்லிச்சு?நீ மொட்டைக் கடிதாசுன்னு சொன்னதும் தான் எனக்கு நம்ம சாந்தா டீச்சர் ஞாபகத்துக்கு வாராங்க.ஆமா..அந்த மேட்டர் நடந்து ஒரு பதினெட்டு வருஷம் இருக்குமா??"

"செந்தில் திஸ் இஸ் டூ மச்,மனுஷன் இங்கே குழப்பத்தில கொந்தளிச்சுட்டு இருக்கேன்.நீ பாட்டுக்கு சிரிச்சுட்டு பழைய குப்பையக் கிளறீட்டு இருக்கே??"

செந்திலுக்கு அபார ஞாபகசக்தி.ஆன தேவையில்லாத விஷயங்களைத் தான் அதிகமா மெமரில ஏத்தி வச்சிருப்பான்.அவன் சொன்ன அந்த விஷயம் நாங்க ஒன்பதாம் வகுப்பு படிக்கும்போது நடந்தது.மொட்டைக் கடிதாசுன்னு பேச்சு வந்தாலோ இல்லே எங்கேயாவது அதப் பத்தி படிச்சாலோ எனக்கு உடனே சாந்தா டீச்சர் தான் ஞாபகம் வருவாங்க.

நான் ஒன்பதாம் வகுப்பு படிக்கும்போது:

"டேய்...விஸ்வநாதா இது தப்பில்லையா??"

"செந்தில்.நீ அனியாயத்துக்கு பயந்தாங்கொள்ளியா இருக்கியேடா.உங்கப்பா மிலிட்டரில இருக்கிறார்.நீ என்னடான்னே இந்த மாதிரி சின்ன சின்ன விஷயத்துக்கு எல்லாம் போய் பயந்திட்டு இருக்கியே?நாலு பேருக்கு நல்லது செய்யற மாதிரி இருந்தா எந்த ஒரு விஷயமும் தப்பில்லைன்னு எங்க தலைவரே நாயகன்ல சொல்லியிருக்காரு.அதனால இது தப்பில்லை"

"அது சரி.நாலு பேருக்கு நல்லது செய்யற விஷயம் தான தப்பில்லை.இங்கே நானு,நீ ரெண்டு பேரு தான் இருக்கோம்.விஸ்வநாதா எனக்கென்னமோ இது கொஞ்சம் ஓவராய்த் தோணுது."

"அடச்சே..ஏண்டா பொட்டைப்புள்ளை மாதிரி பயப்படுதே???எங்க அப்பா நம்ம பழைய லைப்ரேரியன் சரியான நேரத்துக்கு வர மாட்டேங்கிறார்னு மொட்டைப்பெட்டிஷன் எழுதிப்போட்ட பொறவு தான் அந்த லைப்ரேரியனுக்கு கவுர்மென்டில ரிவிட் அடிச்சாங்க.இப்போ பாரு எப்படி டாண்ணு நேரத்துக்கு வந்திடறாரு.உனக்கு ஒரு மேட்டர் தெரியுமா?அந்த லெட்டரை என்னை வச்சித் தான் எழுதினாரு எங்க அப்பா. அது மாதிரி நம்மளையே எப்போ பார்த்தாலும் குறி வச்சு ரிவிட் அடிக்கிற சைன்ஸ் டீச்சருக்கு வக்கிற ஆப்பு தான் இந்தக் கடிதாசு"

"வெறும் கடிதாசு இல்லை.மொட்டைக் கடிதாசுன்னு சொல்லுடா.யாரோ வார மாதிரியிருக்கு.உள்ளே பாக்கெட்ல வச்சுக்கோ"

ஆம்.எங்கள் ஒன்பதாம் வகுப்பு "ஆ" பிரிவுக்கு அறிவியல் பாடம் சொல்லித்தர புதிதாய் வந்திருக்கும் சாந்தா டீச்சர் தான் எங்களது மொட்டைக் கடிதாசியின் இலக்கு.பின்னே என்னவாம்???அறிவியல் பாடமே சுட்டுப் போட்டாலும் வராத மக்குகள் பலரிருக்க,சுமாராய்ப் படிக்கும் எங்களையே குறி பார்த்து ஒவ்வொரு வகுப்பிலும் அத்தனை பேர் முன்னிலையிலும் அவமானப்படுத்துவதை என்னால் மறக்கவே முடியாது.புதுசாத் தாவணி போட்ட குமரிகள் முன்னால்,இன்னமும் திருமணம் ஒரு டிச்சர் கையால் அடி வாங்குவதை எத்தனை நாள் தான் பொறுத்துக்கொள்வது.

அப்பா சொல்படி மொட்டைப் பெட்டிஷன்கள் பல எழுதிய அனுபவம் உள்ள எனக்கு,இதெல்லாம் வெறும் ஜூஜூபியாய் இருந்தது.எங்கள் திட்டத்தின் படி ஒரு அரையாண்டுப் பரிச்சை விடுமுறை ஆரம்பிக்கும் சமயம்,இது போல ஒரு கடிதாசியை எழுதி அனுப்பிவிட வேண்டும்.

என்னன்னு எழுதறது...???ஹூம்..புதுசா வந்த பீ.டி.மாஸ்டருக்கும் நம்ம சையின்ஸ் டீச்சருக்கும் கசமுசான்னு எழுதுவோம்.அப்போ தான் விஷயம் இன்னும் பெரிசாகும்.பீ.டி.மாஸ்டருக்கும் இன்னும் கல்யாணம் ஆகலை.எப்போ ஸ்டாஃப்ரூம் போனாலும் ஏதோ பாலமுருகன் புத்தகங்களைப் பத்தி ரெண்டு பேரும் சதா அரட்டை அடிச்சிக்கிட்டே இருக்காங்க.அதுவும் தவிர ரெண்டு பேரும் வேற வேற ஜாதி.

அது சரி...யாருக்கு அனுப்புவது ?? தலைமை ஆசிரியருக்கு..சே..அந்த ஆள் பொண்ணுங்களைப் பார்த்தாலே மூத்திரம் குடிச்ச மாடு மாதிரி குழைவான்.திட்டம் படுதோல்வி ஆகிடும்..ஊர் ப்ரெசிடன்டுக்கு அனுப்புவோமே.சே..அந்த ஆளுக்குக் குடும்பத்திலேயே பல சிக்கல் இருக்கு.இதில எங்கே இதையெல்லாம் கவனிக்கப் போறாரு.பேசாம சாந்தா டீச்சர் வீட்டுக்கே அனுப்பிட வேண்டியது தான்.அவங்க அப்பா வேற செம ஸ்ட்ரிக்டுன்னு கேள்விப்பட்டிருக்கேன்.விஷயம் தெரிங்சதும் அவங்க அப்பா டீச்சரை வேற ஊருக்கு மாத்தல் வாங்கச் சொல்லிக் கட்டாயப்படுத்துவாரு,இல்லை டீச்சர் கொஞ்ச நாளைக்கு எங்களை அடிக்காம தன்னோட சொந்த துக்கத்தில மூழ்கிக் கிடப்பாங்க.

அப்புறமென்னா எங்க காட்டில தெனம் தெனம் மழை தான்.

திட்டத்தின் படி,எங்கள் அரையாண்டுப் பரிச்சை முடிந்த ஒரு சுபயோக சுபதினத்தில் எனது இடது கையினால் எழுதிய அந்த மொட்டைக் கடிதாசியினை பதினைந்து கிலோமீட்டர் தொலைவிலுள்ள பழனிக்குச் சென்று போஸ்ட் செய்துவிட்டு வந்தோம்.போஸ்ட் செய்த மறு நாளே நான் தாத்தா ஊருக்கும்,செந்தில் தனது மாமா ஊருக்கும் பயணப்பட்டோம்.எனது உடல் தான் தாத்த ஊரில் இருந்தது.முழு மனசும் டீசச்ர் வீட்டில் லெட்டர் கிடைத்ததா,அதற்குப் பின்னால் டீச்சருக்கு என்ன ஆயிருக்கும் என்பதைப் பற்றியே ஆராய்ச்சி செய்து கொண்டிருந்தது.

(தொடரும்)

கொறிக்கக் கொஞ்சம் "ஓ"மப்பொடி - 5

1)விஸ்வனாதன் - ராமமூர்த்தி இணை பிரிந்ததும் இருவரும் தனித்தனியாக இசையமைத்த படங்கள் எவை?

2)"உள்ளத்தை அள்ளித்தா" - ஒரு பழையபடத்தின் டிட்டோ காப்பி ஆகும்.அந்த ஒரிஜினல் படம் எது?

3)"ராசாத்தி,என் உசிரு என்னுதில்லை" திருடா-திருடாவில் இடம் பெற்ற இந்தப் பாடலின் சிறப்பம்சம் என்ன?

4)தஞ்சைப் பெரியகோவிலைப் பற்றிய நீண்ட காலம் மக்களிடையே பேசப்பட்டு வந்த ஒரு விஷயம்,பொய்யான ஒன்று அறிஞர் பெருமக்களால் நிரூபிக்கப்பட்டுள்ளது.நான் எதை பற்றிக் குறிப்பிடுகிறேன்?

5)ஜெயலலிதா நடித்து கடைசியாக வெளிவந்த திரைப்படம் எது?

---------------------------------------------------------------------------------------------------

சொன்னாங்க...சொன்னாங்க

1) " My plight is like Draupadi's.Everyone watched her being disrobed but no one helped."

--- 1998 மக்களவைத் தேர்தலில் போட்டியிட சீட்டு மறுக்கப்பட்ட நிலையில் P.V.நரசிம்மராவ்

2) " The wife has not won.I have handed her husband back to her on a golden platter."

--- அமிதாப்,ஜெயா பச்சன் தம்பதியர் பற்றி ரேகா 1987-ல்

3) "The Rashtrapathi bhavan should not be treated like a nursing home.Of late,it has unfortunately became a den of the retiring old."

--- ராம் ஜெத்மலானி 1992-ல்

4) " From a buffalo's back I have landed into a helicopter. This is real democracy"

--- 1993ல் பீகார் முதல்வரான பின் லாலூ யாதவ்

ஆப்பரேஷன் "மொட்டைக் கடிதாசு"

வினோத் பேசுகிறேன்:

நேற்று இரவு 11.30 மணி:

"ஆப்பரேஷன் சக்ஸஸ்,Fwded தலை'ஸ் மெயில் டூ பெர்சு" என்னும் குறுஞ்செய்தியை வாசித்ததும் செபியுடன் உடனே பேச வேண்டும் என்னும் ஆர்வம் மனத்தில் பீறிட்டுக் கிளம்பியது.இரவு 10 மணி வாக்கில் அனுப்பப்பட்ட தகவலானது என்னைச் சேர்ந்த நேரமோ மனி 11.15.இதற்கு மேல் அவனைத் தொந்தரவு செய்ய வேண்டாம்;காலையில் அலுவலகத்தில் போய் பேசிக் கொள்ளலாம் எனத் தீர்மானித்து விட்டு உறங்கப் போனேன்.புரண்டு புரண்டு படுத்தும் தூக்கம் வரவில்லை.அது சரி இந்த நல்ல செய்திக்குத் தானே கடந்த 168 மணி நேரமாய்க் காத்துக் கொண்டிருந்தோம்.காரியம் நல்லபடியாய் முடிந்ததைக் கொண்டாடாமல் எப்படித் தூங்க முடியும்?

என்னடா இவன் ஓவராகப் பில்ட்-அப் கொடுக்கிறானே என்று பார்க்கிறீர்களா?

விஷயம் பெரிதாக ஒன்றுமில்லை.அடியேனுக்கும்,செபி அலையஸ் செபாஸ்டியனுக்கும் சமீபத்தில் நடந்து முடிந்த வருடாந்தர அப்ரெய்ஸலில் புதிதாக எங்களுக்கு வந்த மேனேஜர் அல்வா கிண்டி கொடுத்து விட்டார்(வழக்கம் போலவே).இதைவிடக் கேவலமான உத்யோக ரேட்டிங் கார்டை இதுவரை யாரும் வாங்கியிருக்கவே மாட்டார்கள்.
என்னதான் உயிரைக் கொடுத்து வேலை செய்தாலும்,மேலாளர்களுக்கு சோப்பு போடாத அவர்களைக் காக்காய் பிடிக்காத எல்லாருக்கும் கம்பெனி வேறுபாடின்றி நிகழ்வது தான் இது.என்னைப் பொறுத்தமட்டிலும் சோப்பு போடுவது என்பது பிடிக்காத,எனக்கு சுட்டுப் போட்டாலும் வராத ஒரு சமாச்சாரம்.

போன வருடமும் இதேபோல் இதற்கு முந்தைய மேனேஜரால் தரப்பட்ட மோசமான பின்னூட்டத்தினால் எனக்கு வரவிருந்த பணி உயர்வும் அது சார்ந்த சௌகர்யங்களும் பறி போனது.சரி அடுத்த முறை பார்த்துக் கொள்வோம் என்று ஒரு வருடம் இலவு காத்த கிளியாய் இருந்த எனக்கு இந்த முறையும் அதே அல்வாவை வேறு ஒருவர் அழகாய்க் கிண்டித் தந்தார்.செபியின் கதையைக் கேட்கவே வேண்டாம்.அவனுடைய காதலி இருக்கும் சென்னை கிளைக்கு மாற்றல் வேண்டி அனுப்பப்பட்ட விண்ணப்பத்தினை,ஏதோ சொத்தை காரணம் காட்டி நிறுத்திவிட்டார். எதிரிக்கு எதிரி நண்பன் என்னும் சித்தாந்தத்தின் படி நானும் செபியும் இத்தகைய ஒரு சூழலில் போட்ட ஆப்பரேஷன் தான் இது.

ஒரு வாரத்திற்கு முன்னால்,காலையில் 11.30 மணி:

"டேய் செபி,உண்மையாவா சொல்றே?"

"மொதல்ல அந்த மேட்ச் பாக்சை இப்படிக் கொடு.தல செல்ஃபோன்ல குசுகுன்னு யாரோ கன்சல்டன்ட் கிட்ட பேசினதக் கேட்டிட்டுத் தான் இருந்தேன்.சம்பளம் பத்தியும் ஓவரால் பெனிஃபிட்ஸ் பத்தியும் கேட்டது என் காதில ஸ்பஷ்டமா விழுந்தது.நான் பார்க்கறென்னு தெரிஞ்சதுமே யாரோ பேங்க் ஆளு கிட்ட பேசற மாதிரி மனுஷன் இன்ட்ரெஸ்ட் ரேட் பத்தி விசாரிக்க ஆரம்பிசிட்டான்.சரியான டகால்ட்டி டாக் அது.அப்புறம் நம்ம ரெட்டி கூட தலயை போன வாரம் "இன்னவேட்டர் பில்டிங்ல" ஃபுல் பார்மல்சில பார்த்ததா சொன்னான்.கிளையன்ட் மீட்டிங்குக்கே செப்பல்சில வர்ர ஆளு,அங்கே ஷூ எல்லாம் போட்டிட்டு என்ன பண்ணியிருப்பான்??"

"ஹூம்.நீ சொல்றத வச்சிப் பார்க்கும் போது பட்சி வெளியே பறக்கத் திட்டம் போடுதுன்னு நினைக்கிறேன்.பறந்து போறதுக்குள்ள அதுகிட்ட கொஞ்சம் வெளையாடிப் பார்த்தாத்தான் என்ன?செபி சேட்டா எனிக்கு ஒரு ஐடியா தோணுது"என்று உருவானது தான் இந்த ஆப்பரேஷன்.

என்ன ஜேம்ஸ்பாண்ட் பட எஃபெக்ட் கிடைக்கிறதா??(சரி..சரி...எனக்கே கொஞ்சம் ஓவராத் தான் இருக்கு)

மற்ற நண்பர்களைக் கலாய்ப்பதற்காக, செபி பல்வேறு பெயர்களில் மின்னஞ்சல் கணக்குகளைத் ஜீமெயிலில் துவக்கி வைத்திருப்பான்.அதில் ஒன்று தான் எங்கள் ஆப்பரேஷனுக்கு உதவப் போகும் ஒரு ஒரு தனியார் ஜாப் கன்சல்டன்டின் மின்னஞ்சல் முகவரி.

அந்த முகவரியிலிருந்து எங்கல் தலக்கு "வெளி நாட்டு வேலை வாய்ப்புகள்" பற்றிய ஒரு மயிலைத் தட்டி விட்டு அதற்கு தலயிடமிருந்து ரெஸ்பான்சினையும் கூடவே அதனுடைய பயோடேட்டாவினையும் பெறுவது தான் ஆப்பரேஷனின் முதல் இலக்கு.அப்படி தலயிடமிருந்துவந்த மயிலினை தலயின் தலையான பெரிசுக்கு அனுப்பி வைப்பதுதான் எங்கள் ஆப்பரேஷனின் இறுதி இலக்கு.

"வினோ.சரி நம்மோட மெயிலுக்கு மயங்கி தலையும் அவரோட CV-ய அனுப்பிடறாரு.அதை பெருசுக்கு forward பண்றதனால என்ன லாபம்?ஏதோ வயாக்ரா மாத்திரை,ஜேக்பாட் அடிச்சிடுச்சு அப்படின்னு தினமும் வர்ர ஸ்பேம் மெயில்கள்ள ஒண்ணுனு நினைச்சி டெலீட் செஞ்சிட்டார்னா?"

"செபி.இப்பெல்லாம் மேனேஜர் லெவல்ல வேலை மாற்றும் ஆளுங்களோட ப்ரொஃபைல் சரியாத்தான் இருக்கா இல்லை ஏதாவது மொள்ளமாரித்தனம் பண்றாங்களான்னு கண்டுபிடிக்க நெறைய பேக்கிரவுண்டு செக் செஞ்சிட்டு இருக்காங்க.அப்படி நம்ம தலையோட பேக்கிரவுண்ட் செக்குகாகத் தான் இந்த மயிலை அனுப்பறோம்னு தெளிவாச் சொல்லீடுவோம்.நாம பெருசுக்கு அனுப்பற மெயில்ல இந்த மாதிரி உங்க கம்பெனியில உங்க கீழ வேலை செய்யும் இவர்,புதிய வேலை தேடிக்கொண்டிருக்கிறார்.இவரோட ஃப்ரொபைலையும் அனுப்பியிருக்காரு.இது கரீக்டான்னு பார்த்துச் சொல்லௌங்களேன் அப்படின்னு ஒரு பிட்டைப் போடுவோம்"

நான் சொல்லி முடித்தது தான் தாமதம்.இதற்காகவே ஜென்ம ஜென்மங்களாய்க் காத்திருந்தது போலத் துள்ளிக் குதித்தான் செபி.

"அடிப்பொளி சேட்டா,சூப்பர் ஐடியா மச்சி,இது மட்டும் சக்ஸஸ் ஆச்சு உனக்கு ஒரு பெரிய ட்ரீட் தர்ரேன்".

"செபி.முதல் கட்ட நடவடிக்கையின் படி நம்ம தலைக்கு ஒரு ஜாப் கன்சல்டன்ட் கிட்ட இருந்து அனுப்பின மாதிரி ஒரு மெயில் ரெடி பண்ணு.நான் போய் ஒரு தம் போட்டிட்டு வந்திடரேன்".மனம் முழுக்க ஒரு சாதனையைச் செய்த நிறைவு.முழு சிகரெட்டினையும் இழுக்க முடியாமல் பாதியிலே திரும்ப செபியின் இருக்கைக்கு வந்தேன்.ட்ராஃப்ட் காப்பியுடன் தயாராக இருந்தான் செபி.

"சான்ஸே இல்லை.இந்த மாதிரி ஒரு மெயிலைப் பார்த்தா நம்ம தல மட்டும் இல்லை.நம்ம பெரிசுக்கே சபலம் வந்திடும்.சரி தலயோட பெர்சனல் ஐ.டி. தெரியுமா உனக்கு"

********@hotmail.com தானே??

"அத்தே தான்.ரெடி...ஒன் டூ த்ரீ...இப்போ சென்ட் பட்டனை அமுக்கு."

"அப்பாடா.ஒரு வழியா அனுப்பிட்டேன்.வினோ,இப்பவே கேன்டீன் போய் இந்த சந்தோஷத்தைக் கொண்டாடலாம்."

இன்று அலுவலகத்தில்,காலை 10 மணி:

"செபி, ஏன் இவ்ளோ லேட்டா வர்ரே?என்ன நைட்டு ஓவர் தண்ணியா??"

"வினோ,உனக்கே இதெல்லாம் ஓவராத் தெரியலை.நம்ம வாத்யாரோட ஜூனியருக்கு இன்னைக்குப் பிறந்த நாளாம்.சாயங்காலம் பார்ட்டிக்கு கூப்பிட்டிருக்கார்.கிஃப்ட் வாங்கப் போயிருந்தேன்.நேத்து கூட இதப் பத்தி பேசீட்டு இருந்தோமே..சரியான பட்ட்ர் நீ..."

"சரி...சரி.ரிலாக்ஸ் மேன்.எங்கே நம்ம தல கிட்ட வந்த மெயிலைக் காமி."

"இங்கே பாரு.இந்த மெயில் தான்.பயங்கர டெஸ்பரேட்டா வேலை தேடீட்டு இருக்கார் போலத் தோணுது.பாரேன்... முகம் தெரியாத ஒரு அனானிமஸ் மெயிலை நம்பி அவரோட முழு ப்ரொஃபைலையும் அனுப்பி இருக்கார்.சரி இந்த மெயிலை இப்போ என்ன பண்ணலாம் வினோ?"

"அப்படியே Fwd பட்டனை அமுக்கி நாம அன்னைக்கு முடிவு செஞ்சு வச்ச மாதிரி ஒரு மெயிலைத் தட்டி நம்ம பெரிசோட அஃபீஷியல் மெயில் ஐ.டிக்கு அனுப்ப வேண்டியதுதான்."

அப்படி அனுப்பிய நாற்பதாவது நிமிடத்தில் எங்கள் தல பெரிசின் அறைக்குள் சென்றது.அந்த நாற்பது நிமிடங்களும் எங்களுக்கு யுகங்களாய்க் கழிந்தது.

"வினோ.பெரிசு நாம அனுப்பின மெயிலை முழுசா நம்பிட்டார் போலத் தோணுது"

"எப்படிறா சொல்றே?"

"தல, பெருசு ரூமுக்குள்ளார போய் இருபது நிமிஷம் ஆச்சு..இன்னும் காணோமே" என்று சொல்லி முடிப்பதற்குள் வாயெல்லாம் பல்லாக வெளிப்பட்டார் எங்கள் தல.அதற்குப் பிறகு எங்களுக்குக் கையும் ஓடவில்லை;காலும் ஓடவில்லை.

பெரிசு கண்டிப்பாகக் கடித்துக் குதறி இருப்பாரே?கடி வாங்கிய பிறகும் மனிதர் சந்தோஷமாக இருக்கிறாரே???உள்ளே என்ன நடந்து இருக்கும்?

கடிக்க எனக்கு பன்னிரெண்டு நகங்கள் போதவில்லை....

(தொடரும்)

*************************************************************
உள்ளே அப்படி என்ன ஆச்சு???கண்டுபிடியுங்களேன் பார்ப்போம்....
*************************************************************

கொறிக்கக் கொஞ்சம் "ஓ"மப்பொடி - 4

தாத்தாவின் வைப்பாட்டி வீடு

சாயக்காரர் தெருவில்

கண்கள் நிறைய மை

மூக்கில் இருபுறமும் மூக்குத்திகள்

எப்போதும் வாயில் வெற்றிலை

அவள்வீட்டுக்குப் போய் வருவதென்றால்

எங்களுக்கு சொர்க்கம் போல

என்னை அவளுக்கு மிகவும் பிடிக்கும்

"மொதலாளிகளோட சின்னவுக பிள்ளை"

அக்கம்பக்கம் என்னை அறிமுகம் செய்வாள்

அஞ்சாம் வகுப்புப்பையன் நான்

வாங்க ராசா என்பாள்

தாத்தா இருக்கும் போது

போகக்கூடாது யாரும்

"இங்க என்னடா ஒனக்கு ஜோலி"

என விரட்டுவார்

"என்னைப் பார்க்க வந்திருக்கு பிள்ளை

இருக்கட்டுமேயே"யென்று இழுத்துக் கொள்வாள்

மீன் குழம்பு ஊற்றி

சோறு பிசைந்தது தருவாள்

"கோழி அடிச்சிருக்கேன் பாட்டிக்கு

கொண்டு போறீகளா" என்பாள்

என் எதிரிலேயே சேலை மாற்றுவாள்

வெட்கப்படும் என் குஞ்சு தொட்டு

கேலி பண்ணிச் சிரிப்பாள்

திடீரென்று ஒருனாள் யாரும்

அவள் வீட்டுக்குப் போகக்கூடாது என்றார்கள்

தாத்தாவும் போகாமல் இருந்தார்

எனக்குப் போய்

அவள் வீட்டு ஊஞ்சலில்

ஆடவேண்டும் போலிருந்தது

யாருக்கும் தெரியாமல் போனேன்

எவரோ ஒருவர் படுத்திருக்க

அவள் விசிறிக் கொண்டிருந்தாள்

"வாங்க என் சின்னராசா"

எப்போதும் போல் அழைத்தாள்

வெறித்துப் பார்த்தேன் பின்

வெறுப்புடன் வெளியில் ஓடினேன்

பலதெரு தாண்டினேன்

ஒருமுனையில் நின்றேன்

மூத்திரம் கழித்தேன் வெகுநேரம்.

-- ஸ்டெல்லாபுரூஸின் "வீட்டுக்குள் ஒரு கல்வெட்டு"

------------------------------------------------------------------------------------------------

இந்த அறுவர் கூட்டணி யார் என்று கண்டுபிடியுங்கள் பார்ப்போம்.

"மாருதி"யின் கதை

14 திசம்பர் 1983 - இந்திய ஆட்டோமொபைல் துறையின் வரலாற்றைப் பொறுத்தமட்டிலும் பொன்னெழுத்துகளால் பொறிக்கப்பட வேண்டிய நாள்.

தினம் தினம் சந்தையில் அறிமுகமாகும் அல்ட்ரா மாடர்ன் கார்களை இன்றைய இந்திய இளைஞர்கள் அலுப்புடன் ஏற்றுக் கொள்கின்றனர்.இன்னமும் புதிய மாடல்கள் சீரான கால இடைவெளியில் அறிமுகப்படுத்தப் படவேண்டும் என்று எதிர்பார்க்கின்றனர்தங்களது வண்டியில் எந்த ஒரு சிறு இடர்பாடோ அல்லது பழுதோ சரியான நேரத்தில் சிறப்பான முறையில் விற்பனைக்குப் பிந்திய சர்வீஸால் கவனிக்கப்பட வேண்டும் என்பதில் பெருங்கவனம் செலுத்துகின்றனர்.பாவம்,23 வருடங்கட்கு முன்னால் இந்தியாவில் வெறும் இரு கார் மாடல்கள் மட்டுமே இருந்தது என்பதனையோ,பிரீமியர் பத்மினி ரக வண்டியை வாங்க நீண்ட காலம் காத்திருக்க வேண்டும் என்பதனையோ அல்லது நுகர்வோர்கள் கார் தேவைக்காகத் தங்களை நம்பி இருக்கிறார்கள் என்னும் நினைப்பில் ஆட்டம் போட்ட டீலர்கள் பற்றியோ அறியாதவர்கள்.

இந்தியாவைப் பொறுத்த மட்டிலும் நான்கு சக்கர சொகுசு வாகனச் சந்தையில் அப்போது ஒரு இக்கட்டான சூழல் நிலவி வந்தது என்பதனை ஒப்புக்கொள்ளத்தான் வேண்டும்.நடுவண் அரசின் சோஷலிசத்தினை அடிப்படையாகக் கொண்ட பொருளாதாரக் கொள்கைகளே இதற்கு முழு முக்கிய காரணம்.சிகப்புநாடா ராஜ்ஜியத்தில், ஆடம்பரப் பொருளாகக் கருதப்பட்ட காரானது பட்டியலில் கடைசி இடத்தினைப் பெற்றது ஒன்றும் ஆச்சரியமான விஷயம் இல்லை. பற்றாக்குறைகள் நிறைந்த,திறம் குறைந்த பொதுப் போக்குவரத்து வசதியினையே, மக்கள் பெரிதும் உபயோகப்படுத்த வேண்டும் என்று எதிர்பார்த்த அரசு வேறு என்ன செய்யும்?உலகளாவிய கார் உற்பத்தித்துறையுடன் ஒப்பிடுகையில் இந்தியாவின் நிலை மிகவும் மோசமாக இருந்தது.இந்திய நடுத்தர வர்க்கத்தினரில் சிலர் காரில் செல்வது பற்றிய கனவுகளில், எப்போதும் போல அமிழ்ந்திருந்தனர்.

அப்புறம் என்ன ஆச்சு??

ஒரு ஏர்-க்ராஷில் சஞ்சய்காந்தி இறந்தபின்னர் இந்த நிலைமை மாறத்தொடங்கியது.1970-ஆம் ஆண்டின் போது சஞ்சய்காந்திக்கும் மற்றும் வேறு இரண்டு பேருக்கும் கார்கள் உற்பத்தி செய்வதற்கான உரிமம் அரசால் வழங்கப்பட்டது.அந்த உரிமமானது செயல்முறைப் படுத்தப்படுவது சிவப்பு நாடா சிக்கல்களால் தள்ளிப் போய்க்கொண்டே இருந்தது.அவசரநிலைப் பிரகடனம் மற்றும் அதன் பின்னால் வந்த ஜனதா அரசு என பல்வேறு இடர்பாடுகளுக்கு இடையேயும், சஞ்சய் காந்தியின் மாருதி லிமிட்டெட் நிறுவனமானது கார்களை உற்பத்தி செய்ய முயற்சி செய்து வந்தது.மற்ற இருவரும் அந்த முயற்சியில் கூட ஈடுபடவில்லை.1977ல் மாருதி லிமிட்டெட் நிறுவனம் லிக்குவிடேஷன் ஆனது.1980ல் சஞ்சயின் மறைவுக்குப் பின்னால் சஞ்சயின் கனவினை நனவாக்குவதில் தீவிரமாக ஈடுபடலானார் இந்திரா காந்தி.

பாராளுமன்றத்தில் கொண்டு வரப்பட்ட ஒரு சட்டத்தின் மூலம் அந்த நிறுவனத்தின் சொத்துகள் அனைத்தும் அரசின் வசம் வந்தது.இப்படியாக 100சதவிகித அரசாங்கப் பங்குகளுடன் மாருதி உத்யோக் லிமிட்டெட்(MUL) தொடங்கப்பட்டது.வாகன உருவாக்கத்தில் வெளிநாட்டுத் தொழில்நுட்பமும்,முதலீட்டு ரீதியாக 40 சதவிகித ஈக்வெட்டிக்கு ஒரு வெளிநாட்டுப் பங்குதாரரும் MUL-க்குத் தேவைப்பட்டனர்.இவை எல்லாம் அப்போது இருந்த சோஷலிசம் சார்ந்த பொருளாதாரக் கொள்கைகளுக்கு முரணானது என்பதினை நினைவில் கொள்க.

ஒருபுறம், இந்திய நுகர்வோரின் கார் சம்பந்தமான தேவைகளைக் கண்டறிய ஒரு ஆய்வு மேற்கொள்ளப்பட்டது.மறுபுறம் தொழில் நுட்பம் வழங்கக்கூடிய ஒரு பார்ட்னருக்கான தேடுதல் உலக அளவில் நடந்தது.இறுதியாக ஜப்பானைச் சார்ந்த சுசூகி மோட்டார்ஸ் நிறுவனத்துடன் தொழில்நுட்ப உரிமம் சம்பந்தமாக ஒரு ஒப்பந்தமும்,இருவரும் இணைந்து கூட்டாய் ஒரு நிறுவனம் அமைப்பது சார்பாக ஒரு ஒப்பந்தமும் கையொப்பமிடப்பட்டது.14-திசம்பர் 1983ல், அப்போது இந்தியப் பிரதமரான இந்திரா காந்தி அவர்களால் முதல் மாருதி800 கார் வெளியிடப்பட்டது.அதற்குப் பிறகு பல நிகழ்ந்தது எல்லாம் வரலாறு மறக்காது.

இதைத்தானே நாங்கள் எதிர்பார்த்துக் கொண்டிருந்தோம் என்று இந்திய நடுத்தரமக்கள் போட்டி போட்டுக்கொண்டு வாங்கினர்.கார்களுக்கான உள்ளூர் தேவை எல்லா எதிர்பார்ப்புகளையும் தவிடுபொடியாக்கியது.MUL,களத்தில் இறங்கும் போது ஒரு வருடத்திற்கு ஒரு லட்சம் கார்கள் என்ற இலக்குடன் இறங்கியது.அதற்கு முந்தைய 10 வருடங்களில் வெறும் 35000 - 40000 என்று தேக்க நிலையில் இருந்த மொத்தக் கார் மார்க்கெட்டை வைத்துப் பார்க்கும் போது இந்த இலக்கு சாத்தியமே இல்லை என்று பல "அறிஞர் பெருமக்கள்" திருவாய் மலர்ந்தருளினார்கள்.ஆனால் அப்படிச் சொன்னவர்கள் எல்லாம் ஆச்சரியத்தால் வாயைப் பிளக்கும்படி அமைந்தது அந்தக் காரின் வெற்றி.மாருதி800 வேண்டி முன்பதிவு செய்து நீண்ட காலம் காத்திருத்தல்,காரின் மீதான ப்ரீமியம் போன்றவை பல காலம் தொடர்ந்தது.காலங்கள் உருண்டோடின.1984ல் ஆம்னி,1985ல் ஜிப்ஸி,1993ல் ஜென் என்று புதிய மாடல்கள் சீரான காலகட்டத்தில் அறிமுகப் படுத்தப்பட்டன.

பெருகும் நடுத்தரவர்க்கத்தின் தேவைகளைப் பூர்த்தி செய்யும் வகையில் இந்தியாவில் வெளியான முதல் கார் மாருதி800 எனலாம்.இதுதான் அதனுடைய வெற்றிக்கு மூலகாரணம்.அதிக நம்பகத்தன்மை,வண்டியை இயக்குவதில் இருக்கும் எளிமை மற்றும் பெண்மை கலந்த வெளிப்புறத் தோற்றம் போன்ற குணாதிசியங்கள் பெண்களையும் மாருதியின் பால் ஈர்த்தது.தரத்தில் கொஞ்சமும் விட்டுக் கொடுக்காத ஜப்பானியத் தொழில்நுட்பம்,விற்பனைக்குப் பிந்திய சிறந்த சர்வீஸ் என்ற பண்புகள் மேல்தட்டு வாடிக்கையாளர்களையும் கவர்ந்தது.1994க்குப் பின்னால் அசுரவேகத்தில் அதிகரித்த மாருதியின் வளர்ச்சியைக் கண்ட,உலகளாவிய கார் உற்பத்தியாளர்கள் இந்தியா என்ற மாபெரும் சந்தையின் சக்தியினை அப்போது தான் உணர்ந்தனர்.அதற்குப் பிறகு நடந்ததனை நாடு அறியும்.

சொந்தமாக ஒரு கார் என்னும் பலரது கனவினை நனவாக்கிய மாருதிக்கு ஒரு பெரிய "ஓ..."

தகவல் உபயம்:கூகிளான்டவர்,MUL இணையத் தளம் மற்றும் பொழுது போகாத பூங்காவனம்

கொறிக்கக் கொஞ்சம் "ஓ"மப்பொடி - 3

குளம்படி ஓசைக் கவிதை

குதிரையின் கனைப்புக் கீதம்

வீசிடும் வாலே கொடிகள்

பொங்கிடும் நுரையே கடல்கள்

பிடரியின் வரைவே வயல்கள்

உருண்டிடும் விழியே சக்தி

குதிரையின் உடம்பே பூமி

சிலிர்த்திடும் துடிப்பே உயிர்ப்பு-இது

குதிரைகள் எனக்குச் சொன்ன

வேதத்தின் இரண்டாம் பாடம்

-- பாலகுமாரன் "இரும்பு குதிரைகள்"

------------------------------------------------------------------------------------------------

1975: ஹீரோ சைக்கிள்ஸ் நிறுவனம் இந்தியாவின் மிகப்பெரிய மிதிவண்டி உற்பத்தியாளர் ஆனது.1957ல் வெறும் ஒரு ஆண்டிற்கு 7500 மிதிவண்டிகள் என்று துவங்கிய இந்த நிறுவனத்தின் வருடாந்தர விற்பனை 2005-ல் 6.5 மில்லியனைத் தொட்டது.

1978: இந்தியாவின் முதல் மொபெட்டான "ஹீரோ மெஜஸ்டிக்"சந்தையில் அறிமுகப் படுத்தப்பட்டது.முதல் நான்கு வருடங்களில் இதன் வருடாந்தர உற்பத்தி 1 லட்சத்தைத் தொட்டது.

திசம்பர் 1983: முதல் மாருதி- 800 சாலையில் சீறிப்பாய்ந்த வருடம்.அறிமுகப்படுத்தப்பட்ட இரு வருடங்களிலேயே "மொபிலிட்டி"பற்றிய எண்ணங்களை மாற்றியமைத்த இந்த வண்டி இந்தியாவில் அதிகம் விற்பனையாகும் கார் என்னும் பெருமையினையும் பெற்றது

மே 1985: ஹீரோஹோண்டா நிறுவனத்திலிருந்து முதல் பைக்கான CD100 சந்தையில் காலடி எடுத்துவைத்தது.தடைகள் பல தகர்த்து எறிந்துவிட்டு 2001-ல் உலகில் மிக அதிகம் விற்பனையாகும் பைக் என்னும் சாதனைச் சிகரத்தை எட்டிப் பிடித்தது.

------------------------------------------------------------------------------------------------

ரெனால்ட்ஸ்-045 பால் பாயிண்ட் பேனாவினை(கருப்பு மை) ஓங்கித் தரையில் பதினெட்டு முறைகள் குத்திய பின்னரும் அதை உபயோகப்படுத்துவதில் பிரச்சினை இருக்காது.

பழைய ஒலினாடாவிலுள்ள சுருளினை சுமார் 1.04 மீட்டர் தூரம் வரை அறுந்து போகாமல் இழுத்துக் கொண்டு போகலாம்.

--பொழுது போகாத பூங்காவனம்.

பிளாக்கரின் சொதப்பல்கள்

பிளாக்கரின் சொதப்பல்களால் இன்றைய எனது பதிவினைத் தமிழ்மணத்தில் சேர்க்க இயலாமல் திணறுகிறேன்.கீழே உள்ள சுட்டிக்குச் சென்று இன்றைய நட்சத்திரப் பதிவினை வாசிக்கவும்.

http://konjamkonjam.blogspot.com/2006/08/blog-post_09.html

அன்பின்,
சுதர்சன்.கோபால்

எனது முன் பதின்மங்களில் சில பாடல்கள்

நினைத்துப் பார்த்தல் என்பது எப்போதுமே மனிதனுக்கு அலாதியான விஷயம்.அதெல்லாம் ஒரு காலம் என என்றைக்கோ நடந்தவற்றை ஒவ்வொரு மனிதனின் உள்ளமும் அசைபோடுகிறது.அசை போட்டு அசை போட்டு மனம் ஆனந்தப்படுகிறது அல்லது அல்லல்படுகிறது.

--"அது ஒரு நிலாக் காலம்" நாவலின் ஆரம்பக் குறிப்பிலிருந்து

பதின்ம வயது...ஆஹா... முகத்தில் முட்டையிட்டுக் குஞ்சு பொரிக்க நினைக்கும் பருக்களுக்குப் பின்னால் தான் எத்தனை கனவுகள்,ஆசைகள். வாழ்க்கையில் ரீவைண்ட் என்னும் பொத்தான் இருக்காதா என்று ஏங்காத நாட்கள் இல்லை.

காதல்,நட்பு,நம்பிக்கை துரோகம்,ஏமாற்றம்,துக்கம்,அதீத சந்தோஷம்,வெற்றி,தோல்வி என்று கலைடாஸ்கோப்புக் காட்சிகளாய் விரிகிறது என் பதின்ம நினைவுகள்.அந்த ஒவ்வொரு காட்சியினையும் அப்போது வெளி வந்த பாடல் எப்போதும் நினைவூட்டி வருகிறது. "அந்தக் காலத்துப் பாட்டு மாதிரி வருமா?இப்பவும் வருதே பாட்டுங்கற பேர்ல..." என்று அங்கலாய்க்கும் பெரிசுகளிடம் கேட்டுப்பாருங்கள்.அவர்கள் குறிப்பிடும் எல்லாப் பாடல்களும் அவர்களது பதின்மத்தில் வெளிவந்த திரைப்பாடல்களாகத் தான் இருக்கும்.அப்படி எனது முன் பதின்ம வயதில் ரசித்த சில பாடல்களை இங்கே பட்டியல் இட்டுள்ளேன்.

பூவுக்கென்ன பூட்டு -> பம்பாய்:
ஏ.ஆர்.ரகுமானின் இசை,வைரமுத்துவின் வரிகள்,மணிரத்தினத்தின் இயக்கத்தில் வெளியான "பம்பாய்"யின் பாடல்கள் 1995 ஆம் ஆண்டின் முதல் ஆறு மாதங்களில் சார்ட் பஸ்டராய் இருந்தன.மணீஷாவுக்கு குழந்தை பிறப்பதில் ஆரம்பித்து,அந்தக் குழந்தைகள் பெரிதாவதைக் காட்ட இந்தப் பாடல் உபயோகப்படுத்தப் பட்டிருக்கும்.படத்தின் இரண்டாம் பகுதியில் வரும் இந்தப் பாடலினை நோயல்,அனுபமா மற்றும் பல்லவி பாலசுப்ரமணியம் பாடியிருக்கிறார்கள்.பாடலின் இடையிடையே வரும் புல்லாங்குழலின் interlude அற்புதமாயிருக்கும்.(நவீன்???) முதன்முதலில் தம் அடித்துக் கொண்டே பார்த்த படம் இது,என்பதால் கொஞ்சம் தனி கவனிப்பு இதற்கு.

"வாழத்தானே வாழ்க்கை...வீழ்வதற்கு இல்லை.
ஆசைக்கு ரெக்கை கட்டி கட்டவிழ்த்து ஆட விடு"

காதலிக்கும் பெண்ணின் கைகள்->காதலன்:
காதலன் படத்தில் வந்த அத்துனை பாடல்களும் நன்றாக இருக்கும்.இருந்த போதும் உதித் நாராயணனின் மழலைக் குரலுக்காகவே கேசட்டை ரீவைண்ட செய்து கேட்ட நாட்கள் ஏராளம்.இந்தப் பாடலில் இருந்து தான் உதித்ஜீ தனது தமிள்த் தொன்டினைத் துவங்கினார்.அவருக்கு மட்டுமல்ல பல்லவி பாலசுப்ரமணியத்திற்கும் இது தான் முதல் பாடல்.ஷங்கரின் அட்டகாசமான பாடல் படமாக்கமும்,ராஜூ சுந்தரத்தின் நடன அமைப்பும் பார்ப்பவரை அப்படியே கட்டிப் போட்டுவிடும்.S.P.பாலாவின் நடனமும் தான்.பாடலில் ஒரு குறிப்பிட்ட ஃப்ரேமில் ஷங்கர்,ராஜூசுந்தரம் மற்றும் ஷங்கரின் அசிஸ்டென்ட் மாதேஷ் தோன்றுவார்கள்.தொலைந்து போன ஹூக்கைத் தேடுவதில் ஆரம்பிக்கும் இப்பாடலில் மனம் தொலைந்து போனதில் ஆச்சரியம் ஏதுமில்லை. அப்புறம் எனது முதல் காதல்...காக்கர்லா மகளின் மீது.

"குண்டுமல்லி ரெண்டு ரூபாய்.
உந்தன் கூந்தல் ஏறி உதிரும் பூ கோடி ரூபாய்
பஞ்சு மிட்டாய் அஞ்சு ரூபாய்
நீ பாதி தின்று தந்தாலே லட்ச ரூபாய்"

ரோசாப்பூ சின்ன ரோசாப்பூ -> சூரிய வம்சம்:
"லா லா லா லா..." என்று ஆரம்பிக்கும்போதே உணர்ந்து கொள்ளலாம் இந்தப் பாடல் யாரல் இசையமைக்கப்பட்டது என்று.எளிமையே அழகு என்னும் எனது சித்தாந்தத்துடன் ஒத்துப்போகும் மற்றுமொரு விஷயம் இந்தப் பாடல்.விக்கிரமன்,எஸ்,ஏ,ராஜ்குமார் கூட்டணியில் வெளியான மற்றுமொரு சூப்பர் ஹிட் பாடல்.பாடல் படமாக்கப்பட்ட இடமும்,மு.மேத்தாவின் வரிகளும் பாடலுக்கு மற்றுமொரு பக்கபலம். அப்பாவுக்கும் மகனுக்கும் சண்டை வாராத வீடுகளில்லை.அதுவும் பதின்ம வயதில் கேட்கவே வேண்டாம்.அப்படி ஒருமுறை அப்பாவை எதிர்த்துப் பேசிவிட்டு,மனம் உருகிப் பார்த்த படம்.ஹூம். கலெக்டரம்மாவுக்குக் கணவானாகும் கொடுப்பினை எனக்கு இல்லை.

"மழை பேய்ஞ்சாத் தானே மண்வாசம்...ஒன்னை நெனச்சாலே பூவாசம் தான்"

தாமரைப் பூவுக்கும் தண்ணிக்கும் -> பசும்பொன்;
சீமானின் கதை வசனத்தில்,வித்யாசாகரின் இசையில்,பிரபுவுக்கு அம்மாவாக ராதிகா நடித்து பாரதிராசாவின் இயக்கத்தில் வெளியான மற்றுமொரு கிராமியப் படம்,"பசும்பொன்".பிரபுவுக்கு இணையாய் சரண்யா நீண்ட நாட்களுக்குப் பின்னர் திரையில் தோன்றியது;சிவாஜியும்,பிரபுவும் கடைசியாய் இணைந்து பணியாற்றிய படம் என்னும் பல சிறப்புகளைக் கொண்டது இந்தப் படம்.மூக்கினால் நாக்கினத் தொட இயலாத காதலனும் அவனைச் சீண்டி வேடிக்கை பார்க்கும் காதலிக்கும் இடையிலான ஊடல் தான் பாடல்.கிருஷ்ணசந்தர்,சுஜாதாவின் குரல்கள் விக்கி-யுவா கூட்டணிக்குப் பாந்தமாய்ப் பொருந்தி இருக்கும்..எனக்கு வாழ்க்கையில் நேர்ந்த முதல் மித்திர துரோகம்.ஓட்டைப்பல்லானால் முதுகில் குத்தப்பட்டது மறக்கமுடியாது.சிட்டுக்குக் கல்யாணம் ஆனது உனக்குத் தெரியுமா ஓ.ப.??

"நெலாக் கறைய அழிச்சாலும் ஒன்னத் திருத்த முடியாது
புறட்டிப் போட்டு அடிக்காம ஆமை ஓடு உடையாது"

கவலைப்படாதே சகோதரா -> காதல் கோட்டை:
தேவாவின் இசையில் பெரிய ஹிட்டான ஒரு கானாப் படல்.தலைவாசல் விஜய்க்கு தேவாவின் குரல் கனகச்சிதமாய்ப் பொருந்தி இருக்கும்.தலையுடன் த.வா.விஜயும் சேர்ந்து ஆட முயற்சி செய்திருப்பார்கள். ஒரு ஏற்காட்டுப் பயணத்தில் "சி" செக்சன் சரவணனை இந்தப் பாடல் வைத்துக் கலாய்த்துக் கொண்டே வந்தது அவ்வளவு எளிதாக மறந்துவிட முடியாது.உன்னுடைய வீடியோகடைக்கு அவளுடைய பெயரை வைத்துக் கொண்டாடின என் நல்ல சினேகிதனே,நீ ஏன் குடிப்பதை நிறுத்தக் கூடாது?

ஊ..ல..ல..ல..லா-> மின்சார கனவு:
சித்ராவுக்கு மற்றுமொரு தேசிய விருது.வண்ணமயமான விஷூவல்ஸ்,இளைஞர்களுக்கு இணையாய் ஆடும் நாசர்,பாடலில் இடையில் வரும் சாவுக்கொட்டு,அதற்கு ஆடும் பிரபுதேவா குழுவினர் இதற்கெல்லாம் மேலாக நீல நிற மினி ஸ்கர்ட்டில் காஜோல் என்று ஒரு கலவையான பாடல்.நேர்த்தியான நூல்புடவைகளில் பத்து வருடங்களுக்கு முந்திய அர்ச்சனா மாதிரி சிரித்தபடி எங்கள் மாமாவைப் பார்க்கவந்த உங்களுக்குத் திருமணமானதை ஏன் சொல்லவில்லை?இந்தப் படத்திற்கு நான்,நீங்கள் மற்றும் சாரதி மாமா எனக் கூட்டணியாப் போனது நினைவிருக்கிறதா உங்களுக்கு?

."மழைத்துளி மண்ணில் வந்து சிந்த சிந்த எழுகிறதே ஒரு வாசம்
அது என்னை வானவில்லில் கொண்டு சேர்த்துவிடுகிறதே சில நேரம்"

தென்றல் வந்து தீண்டும்போது ->அவதாரம் :
கண்பார்வையற்ற கதாநாயகிக்கு வண்ணங்களைப் பற்றி கதாநாயகன் விளக்கும் பாடல் இது.அவதாரம்,நாசரின் தயாரிப்பு இயக்கத்தில் வெளியான முதல் படம்.இதில் எல்லாப் பாடல்களையும் இளையராசா பாடியிருப்பார்.இந்தப் படத்தின் ஒரே டூயட் பாடலான இது ஒரு விஷூவல் ட்ரீட். எங்கள் பள்ளிக்கருகே இருந்த ஒரு ஒண்டுக்குடித்தனத்தில் இருந்த பார்வைக் குறைபாடு உடைய சகோதரி,வெற்றுவெளியில் சிரிப்பை விதைத்துக் கொண்டு யாருக்காகக் காத்திருந்தீர்கள்?இந்தப் பாடலைக் கேட்கும் போதெல்லாம் எனக்கு உங்கள் ஞாபகம் தான் வருகிறது என்பதை உங்களுக்கு எப்படிச் சொல்வேன்?

"எவரும் சொல்லாமலே பூக்களும் வாசம் வீசுது
எதுவும் இல்லாமலே மனசெல்லாம் இனிப்பா இனிக்குது"

கோகுலத்துக் கண்ணா கண்ணா->கோகுலத்தில் சீதை:
அகத்தியன் இயக்கும் படங்களுக்கு பாடல்களையும் அவரே எழுதிவிடுவார்.அப்படி அவர் எழுதி தேவா இசையமைப்பில் வந்த இது ஒரு சிச்சுவேஷன் பாடல் ஆகும்.எளிமையான இசைக்காகவும்,அர்த்தமுள்ள வரிகளுக்காகவும்,தேவாவின் குரலுக்காகவும் எனக்கு ரொம்பப் பிடித்த பாடல். இது எங்கள் கணக்கு வாத்தியாருக்கு அர்ப்பணம்.பரிட்சைக்கு முன்னால் நீங்கள் என்னைத் தியேட்டரில் பார்த்ததை எங்கள் அப்பாவிடம் போட்டுக் கொடுக்காமல் இருந்திருந்தால் இன்னேரம் எருமை மாடு மேய்த்துக் கொண்டிருப்பேனோ என்னவோ???

"சோகமில்லை.சொந்தம் தேவையில்லை.ராவணின் நெஞ்சில் காமமில்லை..கிருஷ்ண,கிருஷ்ண,கிருஷ்ண கேசவனே..."

மாயா மச்சீந்த்ரா->இந்தியன்:
கிளைமாக்சினை நெருங்கும் போது வரும் எல்லாப் பாடல்களும் ரசிகர்களை இருக்கையில் கட்டிப் போடும் படியாய் இருக்க வேண்டும் என்னும் திரையுலக லாஜிக்கினை மீறாத மற்றுமொரு பாடல்.அதிலும் ஷங்கரின் இயக்கம்,உலகநாயகனின் நடிப்பில் என்றால் கேட்கவா வேண்டும்.வாலியின் வரிகளை பாலாவும்,சுவர்ணலதாவும் தங்கள் குரலால் மெருகூட்டியிருப்பார்கள்.சரோஜ்கான் தமிழில் பணியாற்றிய ஒரு சில பாடல்களில் இதுவும் ஒன்று.தன்னுடன் வேலை பார்க்கிற பெண்ணை விரும்பி,அப்பா-அம்மா சம்மதத்துடன் கட்டிக் கொண்ட அண்ணனின் வளைந்த மூக்குச்சினேகிதரை இப்போது என் ஊருக்குப் போகும்போது,எங்கள் தெருவில் பார்க்க முடியவில்லை.அவரது கல்யாணத்தில் தான் இந்தப் படம் பார்த்துவிட்டு முதன்முதலில் தீர்த்தவாரி ஆடினேன் என்பது அவருக்குத் தெரிந்திருக்குமோ?

"கனலில் பனியாக் கரைவோமா
கரைந்தே கவிதை புனைவோமா
சொல்லடி சோன் பப்படி"

பாடல்களைப் பிறிதொரு சமயத்தில் மீண்டும் தொடர்வேன்

கொறிக்கக் கொஞ்சம் "ஓ"மப்பொடி - 2

டெல்லி மெட்ரோவினைப் பற்றி அறிந்தவர்கள் மறக்கமுடியாத பெயர் E.ஸ்ரீதரன்.டெல்லி மெட்ரோவின் மேனேஜிங் டைரக்டரான இவரது உழைப்பு,திட்டமிடல்,அர்ப்பணிப்பு காரணாமாகவே மிக்குறைந்த காலகட்டத்தில் அந்தத் திட்டம் வெற்றிகரமாய்ச் செயல்படத் துவங்கியுள்ளது.1932ல் பாலக்காட்டில் பிறந்த இவர் இந்திய ரயில்வேயில் புரிந்த பல்வேறு சாதனைகள் காரணமாக 2003 ஆம் ஆண்டின் ஆசியாவின் கதாநாயகர்களில் ஒருவராக "டைம்" பத்திரிக்கையால் தேர்ந்தெடுக்கப்பட்டார்.இவரைப் பற்றி அனைவரும் அறிந்திராத ஒரு விஷயம்,முன்னாள் தேர்தல் ஆணையர் T.N.சேஷன் இவரது கிளாஸ்மேட் என்பது.

-----------------------------------------------------------------------------------------------------------------------

தூர்தஷனில் 78 பகுதிகளாக வந்த இராமாயணம் பகுதி - 1,மண்டி ஹவுசுக்கு 18ரூ கோடி வருமானத்தை ஈட்டித் தந்தது.இதற்குப் பின்னால் ஒளிபரப்பட்ட பி.ஆர்.சோப்ராவின் மகாபாரத்திற்குப் பார்வையாளரிடையே இருந்த அமோக ஆதரவு காரணமாய் தூர்தஷனின் 10 நொடி ஸ்லாட்டுக்கு விளம்பரதாரர்களிடையே வசூலித்துவந்த தொகை ரூ65,000. அப்போது இது மிகப் பெரிய தொகை.

-----------------------------------------------------------------------------------------------------------------------

ஒரு மனுஷனுக்கும் மனுஷிக்கும் இடையில் சம்பவிக்க முடிவது காதல் மட்டும் தானா?எந்தப் பதில் புன்னகையும் எதிர்பாராமல்,எந்தப் பூச்செண்டுகளும் பரிமாறாமல் இந்த உலகில் எதிரும் புதிருமாக எத்தனை பேர் தாண்டிப் போய்க் கொண்டிருக்கிறோம்.ஒரு காலமும் பேசவே போவதில்லை என்று அறிந்தும்,எத்தனை பேருடன் பேசத் தோன்றுகிறது நமக்கு.

விலைச்சீட்டுப் போல் பெயர் தொங்கவிடப்படாத ஓர் ஆண் ஆண் எனவும்,ஒரு பெண் பெண் எனவும், அவரவர் மேல் உள்ள அதிகபட்ச சினேகிதத்துடனும் மரியாதயுடனும் சந்தித்து,அப்பால் போய் மறுபடி சந்திக்க முடிகிற அல்லது முடியாமலே போய் விடுகிற நல்ல உறவுகளுக்கு என்ன பெயரிடுவது?அந்தக் கவிதைத் தொகுப்புப் போல காதலைக் காதல் என்றும் சொல்லலாம்.சொல்லாமலே கூட இருக்கலாம்.இப்படிச் சொல்லாமலே என்னையும் யாரேனும் நினைத்திருப்பார்கள்.நானும் யாரையேனும் நினைத்திருக்கத்தான் செய்வேன்.

ஒரு குடம் தண்ணி எடுத்து ஒரு பூ பூத்ததாம் - இருக்கும்.

பூக்கத்தானே செடி. "பூக்கவும் தானே" என்பது இன்னும் சரியாக இருக்குமோ?

---வண்ணதாசனின் "பரிமாறாத பூச்செண்டுகள்" கட்டுரையில் இருந்து

சிறுதுளி பெருவெள்ளம்

பானீ,வெள்ளம்,ஜல்,நீரு,நீலு என்று வெவ்வேறு மொழிகளில் அழைக்கப்படும் நீரின்றி அமையாது உலகு.அது சரி வெறுங்கையில் முழம் போட முடியுமா? மழை இன்றி இவ்வுலகின் நீர் ஆதாரங்கள் தான் செழிக்குமா?

ஆறு,ஏரி,குளம்,கிணறு,ஓடை,அருவி என்று இந்த உலகிலுள்ள பல்வேறு நீர்வளங்களுக்கு மழையே ஆதாரம்மழை பெய்யாமல் பொய்க்கும்போது தான் அதனுடைய அருமையை உணர்வோம்.சிறுவாணி,புழல் ஏரிகளின் தற்போதைய நீர்வரத்து,அடிப்பம்பு,லாரித் தண்ணீர்,மழை நீர் சேகரிப்புத் திட்டம் என்று ஆயிரம் விஷயங்களைப் பேச,சிந்திக்கத் துவங்குவோம்..பணத்தைப் பல தலைமுறைகளுக்குச் சேமித்துவைக்கத் துடிக்கும் நாம்,நீர் போன்ற இயற்கை வளங்களைப் பொறுத்த மட்டிலும் அவற்றின் மதிப்புணரா தற்குறிகளாய் இருக்கிறோம்.இதே நிலைமை நீடித்து வந்தால் அடுத்த உலகயுத்தம் நீரின் முன்னிட்டே இருக்கும் என்று கூற முடியும்.யார் கண்டது,இந்தியாவே அது போன்றதொரு யுத்தம் துவங்குமிடமாய் இருக்கக் கூடும்.

ஐ.நா. சபையின் உலக நீர்ப்பயன்பாட்டு அறிக்கையின் படி தற்போது உலகிலுள்ள 6 பில்லியன் மக்கள்கூட்டம் ஏறத்தாழ பூமியிலிருக்கும் 54 % தூயநீரினைப் பயன்படுத்தி வருகிறது.2025 ஆம் ஆண்டில் இது 70% ஆக அதிகரிக்கக்கூடும்.தனிமனித நீர்ப்பயன்பாடு தற்போதைய விகிதத்தில் அதிகரித்து வருமாயின் இன்னும் 20 வருடங்களில் மனித சமுதாயம் உலகிலுள்ள 90% நீர்வளங்களைக் காலியாக்கிவிடும்.அடுத்து வரும் இருபதாண்டுகளில் பெருகிவரும் மக்கள்தொகையும் அதனையொட்டி அதிகரிக்கும் நுகர்வுத்தேவைகளும் மேற்கு ஆப்பிரிக்க மற்றும் ஆசிய நாடுகளைத் தண்ணீர் பஞ்சத்திற்கு உள்ளாக்கி விடும்.மரம் வெட்டுவதால் மழை குறைகிறது.மழையில்லாமல் விவசாயம் பொய்த்துவிட்ட நிலையில் வயிற்றுப்பாட்டிற்கு வேலை தேடி நகருக்குப் புலம் பெயர்வோரின் எண்ணிக்கை நாளுக்கு நாள் அதிகரித்து வருகிறது.திட்டமிடப்படாத,கட்டுப்படுத்தப்படாத நகர் புறப்பெருக்கம் அங்குள்ள இயற்கை வளங்களை அழித்து விட்டே நடக்கிறது.என இது ஒரு சுழற்சியான நிகழ்வு.

இந்த நகர்புறப்பெருக்க நிகழ்வுக்கு "தென்னிந்தியாவின் மான்செஸ்டர்" என்றழைக்கப்படும் கோவை மட்டும் விதிவிலக்கா என்ன? சுவையான சிறுவாணி நீருக்குப் பெயர் போன கோவையில் மரம் வளர்ப்பு/பராமரிப்பில் உள்ள தொடர்ச்சியான புறக்கணிப்பு,நீர்வளங்களின் மீதான ஆக்கிரமிப்பு,மோசமான பராமரிப்பு காரணமாய் வெகுவிரைவில் ஒரு தண்ணீர்ப்பஞ்சம் திணிக்கப்பட உள்ளது.சிங்காநல்லூர் குளத்தேரியினைக் கடந்து செல்லும் போதெல்லாம் இந்தக் குளத்தின் இன்றைய மோசமான நிலமைக்கு நாமும் ஒரு காரணம் என்று ஆதங்கப்படுவதோடு இதற்கு நாம் என்ன செய்யப் போகிறோம் என்ற கவலையும் வெகுவாய் இருந்து வந்தது.சிறுதுளி திட்டத்தினைப் பற்றி அறியும் வரையில்.

சிறுதுளிகள் சேர்ந்து உருவாவதே பெருவெள்ளம்.அதுபோல கோவையின் எக்கோஸிஸ்டத்தினைப் புத்துயிரூட்டும் வண்ணம் திருமதி.வனிதா மோகன்(ப்ரிகால்) அவர்களின் சீரிய முயற்சியினால் உருவாக்கப்பட்டதே இந்த சிறுதுளி திட்டம்."தூய்மையான கோவை,பசுமையான கோவை" என்னும் கொள்கைகளுடன் உருவானதே இந்த சிறுதுளி திட்டம்.

இந்தத் திட்டமானது திரு.S.V.பாலசுப்ரமணியம்(CMD,பண்ணாரி அம்மன் சுகர்ஸ்)அவர்களைச் சேர்மனாகவும்,மருத்துவர் R.V.ரமணி(சங்கரா கண் மருத்துவமனை),ரவி சாம்,ஆரதி வரதராஜ்,கனக்லால் அபய்சந்த்,N.V.நாகசுப்ரமணியம் போன்றவர்களை உறுப்பினர்களாகக் கொண்டுள்ள சிறுதுளி ட்ரஸ்டியினால எடுத்து நடத்தப்படுகிறது.பெரிய அளவிலான மழை நீர் சேகரிப்பு,திட/திரவக் கழிவுகள் மேலாண்மை,ஆறு/குளம்/ஏரி போன்ற நீர் வள ஆதாரங்களின் மீதான ஆக்கிரமிப்புகளை அகற்றுதல்,அவற்றினைத் தூர்வாரல்,கரைகளை செப்பனிடுதல்,பெரிய அளவிலான மரப்பெருக்கம் என்று தனது இலக்கினை அடைய வெவ்வேறு களங்களில் பயணிக்கிறது இந்த சிறுதுளி திட்டம்.

கிருஷ்ணாம்பதி,செல்வம்பதி,முத்தண்ணன்குளம்,செல்வமுத்தண்ணன் குளம்,பெரிய குளம்,சின்ன குளம்,வாலன் குளம்,சிங்காநல்லூர் குளத்தேரி போன்றவை கோவையிலுள்ள சில முக்கிய குளங்கள்.நகரின் வெவ்வேறு பகுதிகளில் உள்ள இந்தக் குளங்கள் நிலத்தடியே உள்ள கால்வாய்களால் ஒன்றோடு ஒன்று இணைக்கப்பட்டுள்ளன.நாளடைவில் பல்வேறு காரணங்களால் இந்தக் கால்வாய்களில் ஏற்பட்ட அடைப்பு காரணமாய் மழைநீரானது குளங்களுக்கிடையே சீராகச் செல்ல இயலாமற்போனது.சில கால்வாய்களின் மேலே நிகழ்ந்த ஆக்கிரமிப்பு,கால்வாய் குளங்களை இணையும் இடத்தில் ஏற்பட்ட பிளாஸ்டிக் அடைப்புகள் போன்றவற்றின் காரணமாய் மழை நீர்வெள்ளமானது எதிர்த் திசையில் பெருகி ஓடி, பல இடங்களை வெள்ளக்காடாக்கிய நிகழ்வுகள் அனைவரும் அறிந்த ஒன்றே.

கோவை மக்களிடையே விழிப்புணர்வையும்,இந்தத் திட்டத்தினால் விளையும் நீண்டகால நன்மைகளையும்,முக்கியமாக நம்மால் முடியும் என்ற நம்பிக்கையினையும் புகுத்த கரும்பு வளர்ப்பு ஆராய்ச்சிக்கூடத்திற்கு அருகே உள்ள கிருஷ்ணாம்பதி குளத்தினைத் தூர் வாரும் பணி முதலில் மேற்கொள்ளப்பட்டது.108 ஏக்கர் பரப்பளவு உள்ள குளத்தில் ஏறத்தாழ 30% ஆக்கிரமிப்பு செய்யப்பட்டிருந்ததது.தூர் வாருதல் முடிந்தபின்னர் மேலும் ஆக்கிரமிப்புகள் நேராவண்ணம் கரைகளை உயர்த்தும் பணியும் மேற்கொள்ளப்பட்டது.இந்தக் குளத்தினை நோக்கிச் செல்லும் கால்வாய்களும் தூர்வாரப்பட்டன.சிறுதுளியின் முதல் துளி இது தான்.பிறகு நடந்ததெல்லாம் வரலாறு தான்.

இந்தத் திட்டத்தின் மற்றுமொரு முக்கிய இலக்கான பெரும் மரப்பெருக்கத்தினை அடைவதன் முதல் படியாகச் சுமார் 1 இலட்சம் மரக்கன்றுகள் பெரியகுளம்,கிருஷ்ணம்பதி போன்ற குளங்களின் கரைகள்,ராம் நகர்,ஹோப் காலேஜ் போன்ற இடங்களில் நடப்பட்டு பராமரிக்கப்பட்டு வருகின்றன.பசுமைப் பயணம் என்னும் இந்த நிகழ்வானது நமது குடியரசுத் தலைவர் டாக்டர்.அப்துல் கலாம் அவர்களால் 6,ஜூலை,2005-ல் துவங்கி வைக்கப்பட்டது. கோவையிலுள்ள பள்ளிச் சிறார்களிடையே மரம் வளர்ப்பதன் முக்கியத்துவத்தினை எடுத்துரைக்கும் வண்ணம் பல்வேறு நிகழ்ச்சிகளை நடத்தியும் வருகிறது.தற்போது நொய்யல் ஆற்றினைச் சுத்திகரிப்பதில் பெரும் முனைப்புடன் இயங்கி வருகிறது சிறுதுளி திட்டம்.

இப்படியாகக் கோவையின் எதிர்காலமானது சத்தமின்றி மாற்றியமைக்கப் பட்டுவருகிறது.

இந்தத் திட்டம் பற்றி மேலதிக விவரங்களுக்கு http://www.siruthuli.org/

இது பற்றிய மற்றுமொரு கட்டுரையைப் பின்னர் தருவேன்.

"தூய்மையான கோவை,பசுமையான கோவை"

கொறிக்கக் கொஞ்சம் "ஓ"மப்பொடி - 1

குதிரைகள் பசுக்கள் போல
வாய்விட்டுக் கதறுவதில்லை
வலியில்லை என்பதல்ல
வலிமையே குதிரைரூபம்
தொட்டதும் சிலிர்க்கும் குதிரை
சவுக்குக்காகப் பணிந்து போகும்-இது
குதிரைகள் எனக்குச் சொன்ன
வேதத்தின் முதலாம் பாடம்.

-- பாலகுமாரனின் "இரும்பு குதிரைகள்"

****************************************************************************

சதிலீலாவதியில் இடம் பெற்ற "மாருகோ மாருகோ" பாடலானது இளையராஜா இசையில் வெளிவந்த 9 படங்களிலிருந்து தேர்ந்தெடுக்கப்பட்ட 14 பாடல்களின் மெட்லீ ஆகும்

1. மாருகோ மாருகோ (வெற்றி விழா)
2. ஆஹா வந்திருச்சு ஆசையில் ஓடிவந்தேன் (கல்யாணராமன்)
3. வாடி என் கப்பக் கிழங்கே (அலைகள் ஓய்வதில்லை)
4. நேத்து ராத்திரி தூக்கம் போச்சுடி (சகலகலா வல்லவன்)
5. இஞ்சி இடுப்பழகா (தேவர் மகன்)
6. சுந்தரி நீயும் சுந்தரன் ஞானும் (மை.ம.கா.ரா)
7. இளமை இதோ இதோ (சகலகலா வல்லவன்)
8. நிலா காயுது (சகலகலா வல்லவன்)
9. என்னடி மீனாக்ஷி (இளமை ஊஞ்சல் ஆடுது)
10. தண்ணீர் கருத்துடுச்சு (இளமை ஊஞ்சல் ஆடுது)
11. போட்டு வைத்த காதல் திட்டம் (சிங்கார வேலன்)
12. ராஜா கைய வச்சா (அபூர்வ சதரர்கள்)
13. ரம் பம் பம் ஆரம்பம் (மை.ம.கா.ரா)
14. பொன்மேனீ உருகுதேய் (மூன்றாம் பிறை)

**********************************************************************************
1)300 மிலி பெப்ஸியை 95 மிலியாகப் பிரித்தால் மூன்று குவளைகள்(ஒவ்வொன்றும் 100மிலி கொள்ளளவு)தேவைப்படும்.

2)சன் தொலைக்காட்சியின் 8 மணி செய்திகளின் நேரத்திற்கும் இந்திய ரயில்வே நேரத்திற்கும் இரு நொடிகள் வித்தியாசம் அவ்வப்போது உள்ளது.

--பொழுது போகாத பூங்காவனம்

"கல்யாண சமையல் சாதம்..."

"சாப்பாடு எல்லாம் நல்லாத்தான் இருந்தது.ஆனா கேரட் பீன்ஸ் பொறியலுக்கு உப்பு பத்தலை.கேரட் கூட அரைவேக்காடாத்தான் இருந்தது.பாயாசம் ஊத்த ஒரு பிளாஸ்டிக் கப்பு வச்சாங்க பாரு.பாயாச சூட்டில கப்பு ஓட்டை ஆகி இலை எல்லாம் பாயாசம் ஓடி.....என்னதான் சொல்லு.போன வாரம் போயிருந்த நம்ம மணியண்ணன் பொண்ணு கல்யாணம் மாதிரி வராது"

"ஏம்பா...டிஃபன் ஏதும் இல்லையா? ஏன்னா,நான் சனிக்கிழமை ஒரு பொழுது தான் சாப்பாடு சாப்பிடுவேன்.இதனாலதான் சனிக்கிழமைகள்ள வர்ர விசேஷங்களுக்கு நான் போரதே கிடையாது."

"என்னங்க.போன பந்தியில மக்கன் பேடா போட்டீங்க.இந்த பந்திக்கு என்னடான்னா மைசூர்பா வைக்கறீங்க?என்னமோ போங்க"

கல்யாண வீடுகளில் இது போன்ற வசனங்களைக் கேட்காத காதுகளே இல்லை என்று உறுதியாகக் கூறிவிடலாம்.இரு குடும்பத்தார் இணையும் ஒரு நிகழ்வாய்த் திருமணங்கள் இருக்கும் இந்தியாவில்,திருமணத்தை முன்னிட்டு நடக்கும் அமளி துமளிகளுக்கு அளவே இல்லை.அதுவும் சாப்பாட்டு விஷயத்தில் அவ்வளவு எளிதாய்த் திருப்தி அடையாத நம்ம ஆளுங்களைத் திருமணத்தில் சமாளிப்பது ஒரு ஹெர்குலியன் டாஸ்க் தான்.கல்யாண முகூர்த்தம் குறிக்கப்பட்டு,நிகழுமிடம் உறுதிப்படுத்தப் பட்டபின்னால் அனைவரும் செய்யும் ஒரு முக்கிய விஷயம் கல்யாணசமையலுக்கு மெனு போடுவதுதான்.

இன்னும் சொல்லப்போனால் பெண்/ஆண் பார்க்கும் படலத்திலேயே மெனு போடுதல் போன்ற் உணவு பற்றிய விவாதங்கள் ஆரம்பித்துவிடுகிறது.பெண்/ஆண் பார்க்கும் படலம் என்றால் எனது நினைவுக்கு வருவது by default மெனுவான சொஜ்ஜியும்,பஜ்ஜியும் தான்(உபயம் தமிழ் நகைச்சுவைத் துணுக்குகள்).சில தமிழ்த் திரைப்படங்களில் சொல்வது போல் சம்பந்தம் முடிக்காமல் அந்த வீட்டில் கையை நனைக்காத மனிதர் இன்றும் உளரோ என்று அவ்வப்போது ஆச்சரியப்பட்டதும் உண்டு.என் அம்மாவைப் பெண் பார்க்கச்சென்ற போது சாப்பிட்ட காப்பிக்கு "நல்லா இருக்கு" என்று சொல்லப்போய் அதனைத் தப்பாய் எடுத்துக்கொண்டு அம்மாவைத் தனக்கு மணம் முடித்ததாய் இன்னமும் அப்பா கூறிக்கொண்டே இருக்கிறார்.இருபத்தைந்து ஆண்டுகளுக்கு மேலாகியும் அந்தக் காப்பியானது அவரது நாக்கின் சுவை மொட்டுகளை விட்டு அகலாது இருக்கிறது.

சரி விஷயத்துக்கு வருவோம்...

கல்யாண சமையல் குழுவினைத் தேர்ந்தெடுத்த பின்,கல்யாண ஸ்வீட்டிற்கு என்ன போடலாம் என்பதில் ஆரம்பிக்கும் மெனு பற்றிய விவாதங்கள்.இரண்டு வீட்டாருக்கும் பொதுவான உறவினரோ,நண்பரோ தான் இதில் பெரும்பாலும் நாட்டாமை செய்து வைப்பார்.அப்படி போடப்படும் மெனுவானது கால தேச வர்த்தமானங்களுக்கு உகந்ததாய் இருத்தல் வேண்டும்.கோடைகாலமென்றால் ஐஸ்கிரீம்,குளிர்பான வகையறாக்களும்,குளிர்காலமென்றால் சூடான பாதாம்பால் வகையறாக்களும் இருக்கும்.இப்படிப் பார்த்துப் பார்த்து முடிவு செய்யப்பட்ட மெனுவினைக் கெடுக்காதது சமையல் குழுவின் கையில் இருந்தாலும்,அது உருவாவதில் இருந்து நுகர்வோரைச் சென்றடைவது வரை இன்னும் சிலருக்கும் பங்கு இருக்கிறது.

யாரைப் பற்றி பேசுகிறேன் என்று புரியவில்லையா??

ஸ்டோர் ரூமில் இருக்கும் மூலப் பொருட்களின் இருப்பைக் கண்காணிப்பவர்(inventory maintenance),சமைக்கப்பட்ட பதார்த்தங்களை விருந்தினருக்குப் பரிமாறுதலை மேற்பார்வையிடுபவர்(client co-ordinator),தவிர இவர்கள் இருவரும் தங்களது டிபார்ட்மென்டில் ஏதாவது பிரச்சினை என்றால் உடனே அணுகும் இவர்களது சமையல் துறையின் பொறுப்பாளர்(project lead) என்ற அந்த மூவர் கூட்டணியைத்தான் குறிப்பிட்டேன்.

ஸ்டோர் ரூமில் இருக்கும் முந்திரி,திராட்சை முதற்கொண்டு எது வெளியே போனாலும் கண்கொத்திப் பாம்பாய் கணக்கு பார்ப்பது தான் இந்த ஸ்டோர்ரூம் பாதுகாவலரின் முக்கிய வேலை.எங்கள் வீட்டுத் திருமணங்களில் ஒன்று விட்ட மிலிட்டரி சித்தப்பா தான் பெரும்பாலும் ஸ்டோர் ரூம் பாதுகாவலராய் இருப்பார்.எதிரிகள் ஊடுறுவா வண்ணம் எல்லையைக் காத்தவருக்கு இதெல்லாம் வெறும் ஜூஜூபி என்பார்.ஆனால் ஸ்டோர் ரூம் சாவி கைக்கு வந்த உடனே அதைப்பூட்டிக் கொண்டு, செவன்ஸ் விளையாடுமிடம் தேடி இவரது கால்கள் சென்றுவிடும்.ஏழரை மணிக்கு ஆரம்பிக்க வேண்டிய பந்திக்கான அப்பளக் கட்டைத் தேடி, ஸ்டோர் ரூமுக்குப் போன சமையல்கார சிதம்பரம் கத்திக் கொண்டிருப்பார்.மிலிட்டரி சித்தப்பாவோ கழுகுக்கு மூக்கு வியர்ப்பது போல ட்ரிங்ஸ் ப்ரெக்கில் வந்து நமது தேவையைத் தீர்த்து வைத்து விட்டி மீண்டும் களம் திரும்புவார்.இது போன்ற சில இடர்பாடுகள் இவரால் இருப்பினும், எங்கள் கல்யாணங்களில் by default ஸ்டோர் ரூம் பாதுகாவலர் மிலிட்டரி சித்தப்பாதான்.

அடுத்து முக்கியமானவர் பந்தி பரிமாறுவதை மேற்பார்வையிடும் எங்களது டேவிட் மாஸ்டர்.இவரது வேலை வாங்கும் திறனைப்பார்த்து அனைவரும் ஹை-ஸ்கூல் பி.டி. மாஸ்டரா இருக்கீங்களா இல்ல சர்க்கஸ்ல ரிங் மாஸ்டரா இருக்கீங்களா என்று ஆச்சரியத்துடன் கேட்பதாய்க் கூறிக் கொண்டிருக்கிறார்.ஆனால் இவரைப் பார்த்தால் விளையாட்டுவாத்தியார் என்று யாருக்குமே எண்ணத் தோணாது.இவரிடம் படித்த/படித்துக் கொண்டிருக்கும் மாணவர் யாராவது வந்துவிட்டால் போது, கொஞ்சம் ஸ்பெஷல் கவனிப்பு கட்டாயம் இருக்கும்.

திருமணம் செய்து கொள்ளாத எங்களது மாமா ஒருவர் தான் இவர்களுக்கெல்லாம் தலை.ஸ்வீட் தீர்ந்து போனால கடையில் வாங்கி வருவதா, இல்லை சுடச்சுடப் போடுவதா என்பதில் ஆரம்பித்துப் பல விஷயங்களில் முடிவெடுக்கும் உரிமை பெற்றவர்.இரவு உணவுக்கு விழுந்த இலைகளை வைத்தே காலை உணவுக்கு வரும் கூட்டத்தைத் துல்லியமாய்க் கணக்கிடுவதில் வல்லவர்.மாப்பிள்ளையின் நட்பு வட்டாரங்களுக்கு வாட்டர் ஸ்போர்ட்ஸின் போது தேவைப்படும் சைட் டிஷ்களைப் பார்சலாய் அனுப்புவது,கல்யாண சம்பிரதாயங்களை முடித்து உணவு உண்ண வரும் மணமக்களுக்கு ஸ்வீட்,சிறப்பு உணவு வகைகளை பத்திரப்படுத்தி வைப்பது,தேவைப்படும் நேரங்களில் சாம்பார் வாளி தூக்குவது,மீதியாகப் போன உணவு வகைகளைப் பக்கத்திலிருக்கும் சேரிக்கு அனுப்பி வைப்பது என்று பார்த்துப் பார்த்துப் பண்ணும் இவர் ஒரு பெரிய ஆல் ரவுண்டர்.

இப்படிக் கல்யாண வீட்டில் பரிமாறப்படும் ஒவ்வொரு கவள சோற்றுக்குப் பின்னாலும்,சொல்லப்படாத ஆயிரம் பேரின் உழைப்பு இருக்கிறது.திருமண வீடுகளில் மற்ற அனைவரும் திருப்தியாக சாப்பிடும் படி பார்த்துக்க் கொள்ளும் இவர்களது அன்றைய உணவு பெரும்பாலும் உப்புமாவாய்த் தான் இருக்கும்.கேட்டால்,"மத்தவங்க சந்தோஷமாச் சாப்பிட்டுப் போறதப் பார்த்தாலே எங்களுக்கு வயறு நெரஞ்சிடும்" என்பார்கள்.இந்த மூன்று பேரும் இல்லாத எங்கள் வீட்டுத் திருமணத்தை, நினைத்துப் பார்க்கக் கூட முடியாது.

உடல் நிலை மோசமான நிலையில் மருத்துவமனையில் இருந்த அந்தப் மாமாவைப் பார்க்க சமீபத்தில் சென்றிருந்தேன்.தனது ஆரஞ்சு ஜூசை என்னோடு பகிர்ந்து சாப்பிட்ட அவரது முகம் வாட்டமாய் இருந்தது.
"என்ன கண்ணு.இப்படி மாமா ஆசுபத்திரியில வந்து அடிக்கடி படுத்துக்கிறார்னு வெசனமா இருக்கா??உன்னோட கல்யாணத்துக்கு சமையல் இன்சார்ஜ் வேலை பார்க்காம நான் வர மாட்டேன்னு எமன் கிட்ட சொல்லியனுப்பீட்டேன்.அதப் பத்தி நீ ஒண்ணும் கவலைப்படாதே"
என்பதைக் கேட்டதும் என் குரல் லேசாய் உடைந்து போனது.